周麗淇速食潮男摸黑走後巷
與徐正曦分手的周麗淇話咁快有着落，最近身邊出現一位高大潮男，日前兩人更摸黑往北角相聚，並肩而行至後巷一幢商廈撐枱腳，離開取車時一度情到濃時想翹手！
現年36歲的周麗淇（Niki）剛於9月爆出與內地靚仔小生徐正曦結束兩年情，向來甚少提及感情事的她表示是和平分手，再見亦是朋友，兩人依然保持聯絡。回復單身後的她曾傳出搭上石油大亨，但她隨即否認戀情，結果Dry了數月即刻有着落，秘密暗撻潮男，日前更神秘返港會新歡！
見新歡即甜笑
近年專注內地拍劇賺人仔的Niki，早前放假返港小休，被發現摸黑「蜜」會高大潮男。日前晚上8時半，Niki駕車前往北角炮台山，駛至蜆殼街附近搵位泊車。停車後，只見她坐在車內久久未有落車，並頻頻低頭撳電話似等人。約15分鐘後，一位身材高大、穿迷彩Tee的潮男行近其座駕，Niki一見潮男即刻甜笑，還一臉冧爆地落車，與潮男在街頭傾了幾句，然後拍住拖行去街尾。
一埋牙想翹手
素顏上陣的Niki先站在路邊，等候對方泊車，隨後肩並肩兼邊行邊傾行去附近一條後巷，鬼祟地進入了該處一幢商廈，搭升降機往樓上餐廳撐枱腳。短聚三小時後，兩人雙雙步出大廈，但似乎意猶未盡，往取車期間仍孖住「蜜蜜傾」雞啄唔斷，潮男更講到手舞足蹈，身旁的Niki耐心聆聽。兩人愈行愈埋想翹手，一度手碰手，行至錶位附近才依依不捨地揮手道別，各自取車離開。
文、攝：追蹤組