嚮往自由 中港兩邊走關禮傑渴求代表作
藝員關禮傑（阿關）近期作品多多，戲路更愈演愈廣，從演多年的他很享受演出，期望有更多的代表作。身為圈中模範爸爸的阿關，兩位千金正身在外地求學，令他十分牽掛，不過談及女兒他即面露笑容，像小朋友般期待聖誕節能與家人團聚。
關禮傑在台慶劇《梟雄》中演城府極深的特務頭領，與好戲之人黃秋生鬥戲無難度，戲裏戲外合作無間，阿關與秋生之前曾合作過：「但今次有好多有卡士嘅演員，好似黎耀祥咁，對啲後生演員嚟講好似考試咁，大家都好盡力去演，氣氛好好。」雖然角色戲份未算吃重，阿關認為角色有發揮空間：「個角色係一個串連故事嘅關鍵人物，要喺有限嘅戲份表現角色性格，都研究咗好耐。」
並不在乎戲份
近年阿關的演出有不少轉變，特別在喜劇上有突破，吸引劇迷注意，他坦言演戲多年，並不在乎戲份，只希望能有更多代表到自己的角色。身為部頭藝員的他有否獲TVB邀請加約？阿關說：「依家咁樣幾好，自己中港兩邊走，自由啲，有好劇本大家會溝通。喺香港拍劇係舒服啲，我又成日掛住屋企。」
期待聖誕團聚
談到家人阿關立即一副冧樣，他說除了長女楓馨正身在加拿大求學外，次女佩盈今年亦遠赴英國讀書，自己又經常來往中港，家人四散各地，令他牽腸掛肚，他說：「大女去讀書時，都諗住仲有細女陪。到佢都去埋讀書，以為自己有咗經驗，點知仲唔捨得！（多咗時間陪太太？）都係佢陪我多，佢有時都會北上探我班。（錫晒囡囡唔怕太太呷醋？）依家有時間二人世界，多啲留喺香港陪番太太，之前同個女約咗喺香港過聖誕，我同太太都好期待。」
文：影視組
攝影：李柏儒
場地：Airisu Cuisine