廖碧兒不擇手段求B雪卵搵代母

母愛氾濫

現年36歲的Bernice已踏入適婚年齡，雖然目前單身，但仍母愛氾濫，時常幫忙照顧胞姊及胞弟的子女。愛心爆棚的她，坦言不會放棄生兒育女，更不排除雪藏卵子或找代母。

「我唔係唔想拍拖，不過依家真係好忙，要拍嘢之餘，又要上葡萄酒大師（Master of Wine）嘅堂預備考試，又要去法國釀酒。其實都有啲朋友會約我食飯，但係感情方面，我都係抱隨緣態度，我目前都係想以工作為先，冇定個期限畀自己幾時之前要結婚。加上我家人依家都冇再催我結婚或者生小朋友，因為佢哋已經有好多孫，我細佬生咗三個，我家姐都有兩個，屋企好熱鬧。

我好鍾意同我啲姨甥同姪仔女玩，每次返嚟香港，我都一定會親自湊家姐個大女返學，就算要朝早五點幾起身、食早餐，都仲係覺得好開心。我真係好鍾意做呢樣嘢，因為平時我去咗外地拍劇嘅話，最多只可以喺skype同佢哋傾偈，又或者等家姐、細佬send佢哋啲相或者片畀我，成日都好掛住佢哋。佢哋雖然咁細個，不過一見到我都會好熱情咁叫我『姑姑』同『姨姨』，好開心佢哋咁少見都仲記得我。」

廖碧兒從沒定下結婚生B期限。	單身的廖碧兒對感情事隨緣。	廖碧兒最愛與姨甥女玩。

力保狀態

「其實我自己都想有小朋友，不過呢啲冇得強求，要睇主畀唔畀我。依家有唔少人都用科技嚟懷孕，好似雪藏卵子，或者搵代母生小朋友。我自己都唔排除將來會用呢啲方法生小朋友，目前都仲未諗雪卵，喺決定做之前，我會做多啲資料搜集先，最緊要係生到一個健康嘅BB。我依家都有成日做運動，一來想自己健康啲、二來保持好身形、三來又可以幫我應付啲動作場面，好似打鬥同揸槍咁。我每星期都會做三至四次運動，好似爬山、跳舞、跑步咁，一直有做開運動，依家唔做會覺得唔舒服。」

廖碧兒喜歡與小朋友相處，湊B零難度。	廖碧兒深得小演員歡心，在片場相處融合。	廖碧兒視Alexandra如女兒，疼愛有加。

拿手湊女

工作忙得不可開交的Bernice，早前於新加坡拍攝電視劇，更首次飾演人母，與一名六歲的小演員Alexandra合作。Bernice笑言自己戲裏戲外都擔任對方媽媽的角色，更激發起自己的母愛，望快些生B。

「因為係拍電視劇，我哋會幾個月喺一齊，Alexandra見我仲多過見佢真嘅媽咪，所以我有責任要好好照顧佢。Alexandra第一次拍劇，不過佢好聰明，好快就知道點就鏡頭。唯一係佢喺冇戲份嗰陣，因為未必覺得攰，所以會係咁同其他人玩，但係到要埋位嗰陣就眼瞓，不過小朋友係咁，冇得控制佢哋。好多人都話同完小朋友合作，就會怕咗小朋友，但係我就啱啱相反，反而仲想快啲生小朋友。

有時Alexandra會叫我『媽咪』，之後攬住我又錫我，真係好sweet，真係好似一個家庭咁。而我亦都真係好似做咗佢媽咪咁，要好好照顧佢。好似佢唔可以食朱古力，因為佢食咗會流鼻血。我就會即刻記住佢唔可以食乜，禁止其他工作人員畀呢啲嘢佢食。同埋有一次，佢喺片場度突然唔見咗，我哋搵咗佢好耐，原來佢匿咗喺廁所度喊。後尾問番佢咩事，先知道原來係佢甩咗鞋帶，佢本來想自己綁，但係有工作人員幫佢綁咗。小朋友諗嘢好直接，我哋要了解佢哋腦裏面諗乜，尤其係佢屋企人唔喺佢身邊，我更加要得到佢信任，好好安慰佢。」

品酒減壓

眾所周知，Bernice非常熱愛葡萄酒，更會親自到美國及法國釀葡萄酒。除了親身落手落腳釀酒，她亦視品酒為減壓良方，並成為香港專業品酒師協會成員。Bernice說：「呢個會嘅成員都對品酒好有熱誠，而且好多成員都係專業人士，佢哋未必知我係藝人，同佢哋一齊真係好Relax。」

文：龔凱欣

攝：吳文聰

髮型：Ivan Lee @ headquarters

化妝：Ivan Lee

服裝：Escada

場地：Madison Wine