翁嘉敏周以敏整餅 焗出名堂
名媛翁嘉敏與周以敏將外國流行的Dessert Table引入香港，甜品生意成立四年一直低調經營，憑着心思及一流技術而打響名堂，獲不少明星名人追捧。
She.com老闆楊鼎立太太翁嘉敏（Liana）與已故「鋼鐵大王」龐鼎元孫新抱周以敏（Emmy）兩人識於大學時期，Liana主修商科在銀行擔任高職，而Emmy則是讀建築亦成為建築師，兩人因為「食」而一拍即合，於四年前開設了網上訂造甜品服務Beyond Dessert，由蛋糕、Cupcake、曲奇至近年十分流行的「Dessert Table」均一手包辦，兩位名媛行事低調，開業至今並沒有大事宣揚，但因為口碑獲一致好評，李嘉欣、邱李茂琪、鄭詩韻等均是捧場客，譚詠麟（阿倫）早前生日的「黃飛鴻蛋糕」亦是出自她們手筆。
大人細路都興奮
至於為何會開設網上訂購甜品？Liana說：「我好鍾意啲精緻得意嘅嘢，又鍾意整甜品，而Emmy畫畫好靚，又鍾意整公仔，不過呢個想法，係因為我個女一歲時，想幫佢開生日派對，於是自己落手落腳整咗一張枱嘅candy，枱上每樣嘢都可以食，鋪晒上枱無論小朋友或大人見到都好興奮、好開心。於是叫埋Emmy一齊做網上訂購，當時香港都仲未流行Dessert Table，我哋係第一個做。我哋對食物品質要求好高，好多idea都會一齊諗，Emmy主力做設計，而我就睇住盤數。」
辭去建築師工作
為了甜品這「心頭好」，Emmy最終辭去專業高薪的建築師工作：「起初搞甜品時都有繼續工作，突然有一日畫圖則畫到好悶，於是就畫起公仔，覺得啲公仔好得意，可以放喺蛋糕度，加上想多啲時間陪個仔，所以決定辭工。」而Liana則說：「銀行工作做咗好多年，唔想咁容易放棄，而且老公都好贊成我做嘢，最多瞓少啲，我已經好多年冇睇過電視。」雖然醉心於工作，但兩人也不會忽略家中的小朋友，異口同聲表示小朋友不用上學時，一定以他們為主，當他們睡覺才開心工作。
文：名人組