安德尊 李錦聯追月爆粗互窒

藝人安德尊與大廚李錦聯在無綫婦女節目《都市閒情》向來「火花」四濺，二人前日「追月」再重逢，一邊煮嘢一邊互窒。安德尊先與李錦聯講定數，叫對方醒醒定定：「嗱師傅，今日中秋，團團圓圓，小心說話。」其後李錦聯腦筋急轉彎，爆出金句：「食咗牛仔骨，唔使亂咁噏。」二人愈講愈興奮，未知是否因李錦聯過度用力拍打對方幾下，令安德尊即時反擊，笑笑口疑似爆粗：「X，師傅，唔好咁大口氣，口臭呀！」不少網友聽到安德尊疑似爆粗，笑指二人雖火藥味濃，但非常爆笑。