龔嘉欣踩足三線：怕觀眾睇厭
龔嘉欣足迹遍布無綫黃金時段三線劇集，穿越時空由古裝到現代總共四個角色。忙到無暇休息變「熊貓」的她，嫌拍拖煩寧願休息大覺瞓。嘉欣更自爆拍《無雙譜》的演技，遭導演狠批：「搞到我好沮喪，試過返屋企喊！」
藝人龔嘉欣偕張景淳，前晚與無綫新劇《無雙譜》幕後食飯兼睇劇集首播。嘉欣最近人氣旺盛，無綫的黃金時段三線劇集《愛‧回家》、《無》劇及《張保仔》都能夠捕獲其足迹。坐擁三劇四角的她，直言怕觀眾睇厭：「都好驚，不過時裝、清裝同神話故事中的角色都好唔同。自己呢輪都好忙，開《愛》劇，做另外兩劇宣傳。有時行唔開就上網出post幫手宣傳，休息唔夠都有黑眼圈。」忙到變「熊貓」的她，更直言連覓愛都嫌麻煩：「搵個瞓覺天子，我唔夠瞓，需要休息多啲就真。」
導演狠批鬧到喊
此外，嘉欣又自爆在拍《無》劇時，遭導演狠批演技：「大部分時間對綠幕做戲，被導演話我啲戲唔得，再嚟！搞到我好沮喪，試過返屋企喊。但經此一役，覺得經驗又好咗。」
而同場的張景淳雖在《無》劇與嘉欣談情，但卻無懼緋聞，皆因二人是認識多年好友，又大讚劇中男女混演主角田蕊妮（阿田）演技了得：「佢做男仔好有氣勢，但當佢變番女裝，又有好可愛嘅一面。」
阿田榮升「小鮮肉」
前日正日生日、最近獲封「小鮮肉」的阿田前晚最後亦現身，嘉欣更在微博大晒與她的合照並留言：「你真的好帥啊，我想……我愛上你了。」
而劇集《張保仔》在中秋節正日收視平均15點，翌日追月當晚急升10點至25點，最高更錄得27點之高。無綫電視企業傳訊部宣傳科副總監曾醒明表示，長假期對收視衝擊大，觀眾亦可在官網重溫。
文：影視料