萬綺雯自嘲生意蠢才：唔蝕就偷笑

藝人歐陽震華與友人合資的食店，昨日在銅鑼灣開幕，太太傅潔嫻、好友陶大宇、萬綺雯（蚊蚊）、阮兆祥、商天娥及黃長興等現身支持，蚊蚊穿上黑色入膊裙到賀，勁晒美腿的她自爆來「視察環境」：「我今日嚟視察環境，因為老爺（Bobby在劇集《東坡家事》暱稱）話《東坡家事》無論開播、聚會、結局飯都喺呢度食。（視察完就入股？）唔喇，我食素，老爺做大生意，唔啱我玩，我同老公都唔係做生意材料，除非有叻人幫手打理，否則我信唔過自己同埋我老公，真係唔好講賺，唔蝕已經偷笑。（做其他投資？）以前買股票蝕晒！後嚟有買樓。（無綫要藝員簽長約？）冇叫我，我哋係部頭合作，我OK呢種形式，自由慣，唔會簽長約。」

試業旺場

Bobby生意則愈做愈旺，他說：「呢間係第3間舖，另外兩間喺筲箕灣同銅鑼灣，呢間投資咗七位數字，試業半個月，晚晚爆滿。呢間好處係有VIP房，可以畀好似蚊蚊呢啲怕醜女仔一啲空間。（呢個舖位上手係范振鋒，唔怕呢個位難經營？）我都開到第3間啦，我哋晚市非常OK，不知幾爆棚。（可有留意無綫要藝人簽長約？）我一年拍一、兩部，簽我20年都冇用！（港姐未讀訓練班就演戲？）早年香港出生率低，等人用就梗！早啲實習仲好，培育後生都係我責任。」

歐陽震華開分店，大批好友撐場。

歐陽震華即興舞獅賀食店開幕。

大宇退股

陶大宇則表示已退股：「雖然佢哋唔介意，但我自覺冇貢獻，剩係分錢，最終我都退咗股，我唔係生意材料，都係做番老本行拍戲！十月底會拍日本同馬來西亞投資電視劇，仲有宣萱、吳啟華同幾個日本演員，會喺香港取景加少少日本外景，我唔使講日文對白，但喺日本播應該會搵人幫我配音。」

文：影視組