馬國明忘形爆粗網民讚夠真

音樂人林敏驄向來喜歡整蠱其他藝人，最新「受害者」正是無綫小生馬國明！日前阿驄在社交網站Facebook上載了一段馬國明疑似爆粗片，片段一開始他即爆出一句：「依家26、7點好X高啦！」之後林敏驄問他：「馬國明呢排搞咁多女呀？」馬國明開玩笑說：「我梗係啦！我哋呢啲……」片段便完結。結果引來約1.5萬次瀏覽！

而片中尚有藝人吳家樂，三人身穿足球波衫，相信是踢波期間拍攝。事件並沒有影響馬國明形象，不少網民留言讚他爆粗順耳又搞笑：「好順口，聽落舒服，可以接受！」、「馬明男神夠真、正、撐！」

林敏驄在Facebook上載一段馬國明疑似爆粗片，引來大批網民畀Like！	吳家樂（右）亦成為爆粗嫌疑者之一。	林敏驄（右）「出賣」波友，吳家樂笑言以後要防範他。

唔想再回應

對於爆粗片段「流出」，馬國明昨日表現輕鬆，但表示不想多回應：「呢樣（爆粗）唔回應喇！你哋有咩問阿驄啦！（嬲佢？）唔會嘅。」身在日本的林敏驄昨日在電話中笑住說並非馬國明爆粗：「係吳家樂呀！後面好嘈嘛！不過不嬲馬國明好活潑，就算係佢講都好閒啫！Man啲仲好啦！形象百變啲，唔使成日做小生！（佢講26、7點係講咩？）哦！佢成日畀女點，點開都26、7個(o架)！咁多個小生當中，佢係畀女點得最多嘅一個。」

激嬲吳家樂

至於被阿驄笑指是「爆粗真兇」的吳家樂，在片中神情愕然，昨日他直言不滿：「我嬲呀！阿驄真係衰仔，冇諗過佢會放片上網，不過大家知冇嘢，叫佢唔好再跣人啦！」

家樂笑言他們平日踢波不會左避右避，但經過此事後會避忌：「更熟都係咁話！我以後喺佢面前真係唔出聲，衫都唔會除，喺更衣室我會避開佢，點知佢又會拍啲咩放上網呀？」對於網民讚馬國明爆粗夠型，家樂說：「佢係講得好型呀！」

文：影視組