王菀之冧男友：冇人出色過佢！
近期人氣爆燈的王菀之（Ivana）首度孖男友Eric So出席活動，一提到有關結婚的話題Ivana即面紅，sweet爆謂：「心目中冇人出色過佢！」另外，跟Ivana一同主演電影《沒女神探》的陳嘉寳趁歌迷會成立一周年，包場與粉絲睇戲。
藝人王菀之（Ivana）與設計師男友Eric So昨日出席元朗商場gallery lounge的開幕禮，兩人更特別為此設計了融入中西元素的香檳樽。接受訪問時，談到兩人首次情侶檔出席活動，Ivana表示最開心是活動與藝術有關，笑言：「我自己又鍾意藝術，平時係關於音樂，我好似好有氣質咁！」提到Eric可會不習慣兩人情侶檔出席活動，他指其實都試過，只是大家不知道。問到可會為女友設計唱片封套，他指Ivana間中有提及過，但他沒有信心，笑言：「不敢搞亂檔。」Ivana聽到即冧爆說：「希望所有嘢都係佢整，心目中冇人出色過佢！但Eric本身好忙，所有我要排隊。」
提結婚面紅唔敢講
至於談到將來兩人結婚時，婚禮可會交由Eric設計，Ivana突然面紅，還怕醜笑言將手上的無線咪遞向男友謂：「女仔唔方便講。」而Eric就直言：「佢應承先講啦！（幾時求婚？）提出好奇怪，應該係暗暗地表示嗰啲。（有計劃？）冇乜plan唔planning，感覺到就係。（會畀驚喜？）我成日都畀驚喜佢，不過唔知係驚喜定驚嚇。」
陳嘉寶包場請粉絲
另外，與Ivana一同主演電影《沒女神探》的陳嘉寶（Anjaylia）適逢歌迷會成立一周年，日前她包場與粉絲欣賞電影及粉絲聚會，院內座無虛席。不少fans看完電影後，更大讚她在戲中很放，看到她另外一面。在聚會期間，準備了神秘蛋糕，令Anjaylia十分感動謂：「其實物質唔係最重要，最感動係佢哋一直都好支持我，付出咗很多，所以好感謝佢哋！」
文：音樂組