Bob腰痛礙追仔：淨係老婆郁？

林盛斌昨日現身電視城主持無綫節目《兄弟幫》，訪問李逸朗及邵音音，鏡頭後見他用手按腰，一臉痛苦，原來腰痛復發，他笑言：「『追仔』整傷囉！講笑啫，呢排把聲同狀態都差咗，呢兩日仲腰痛。（好想生仔？）呢排特別想，因為我就嚟生日，願望想生仔。」

囡囡分身家

講起生育，Bob續說：「呢期同老婆傾開生仔改咩名，所以更加要盡快整番好條腰，如果唔係，咪淨係老婆郁？點解我會講呢啲？（有好多錢等住分畀個仔？）唔係，有嘅話啲女都分晒。」

Bob又指老友們都十分擔心他的腰傷：「佢哋介紹好多醫師畀我，又叫我去『啪骨』，好多謝佢哋。其實腰傷係中學打波時積落啲舊患，本來我想每個禮拜休息一至兩日，玩吓女或者齋攤抖，但呢幾個禮拜由朝做到晚，唔知係咪近排翻風落雨，搞到條腰痛到伸唔直。（放假抖吓？）我計劃年底開talk show喎。」

Bob與老婆已育有三女兒。（資料圖片）	莊思敏獲邀任《兄弟幫》嘉賓。	李逸朗（左起）、莊思敏及邵音音齊錄影。

J2播波搶收視

另外，無綫昨公布上周收視，J2台直播中國對香港的世界盃外圍賽，平均收視9.8（約63萬觀眾），最高收視14.1（約91萬觀眾），是J2台2009年開台以來錄得的最佳收視紀錄。

文：影視組