布斯韋利士無法記對白遭炒魷
荷里活著名動作巨星布斯韋利士（Bruce Willis）一向出名難服侍，最近他忙住拍攝鬼才導演活地亞倫（Woody Allen）的新作，被指因記唔到對白而被飛出劇組！布斯上周被影到西裝筆挺，與謝西艾辛堡（Jesse Eisenberg）及姬絲汀史釗活（Kristen Stewart）等在洛杉磯為活地未定名的懷舊新片拍攝。雖然布斯已埋位開工，但日前有消息指布斯要籌備秋季上演的舞台劇《危情十日》（Misery），因撞期而辭演活地新片！
電影公司隨即找來同樣曾與活地合作過的著名男星史提夫卡路爾（Steve Carell）接替布斯繼續演出。雖然官方解釋是因為撞期而被迫辭演，但知情人士就在twitter爆料指，從工作人員的口中得悉布斯因為記唔到對白才被炒魷！他更指就算工作人員現場舉「貓紙」仍幫唔到布斯，搞到幕後及眾演員都嬲到爆。查實今次已非布斯首次被飛出劇組，2013年老牌動作巨星史泰龍（Sylvester Stallone）就在twitter公開批評布斯又貪心又懶惰。
