馬天佑滿足自己：唔做人哋嘅嘢！
在電影《玩轉身前事》之中，主角得知自己大限將至，於是寫下遺願清單，在死前完成……換着是形象指導馬天佑會問：點解唔一早就做？馬天佑也有一張清單，4年前創立製作公司，最近成為歌手，都是他的must do list之內，本着最緊要好玩的態度，天馬行空的創意，認真地玩，無樂不作。
馬天佑是近年炙手可熱的形象指導，可能大家對他未必最熟悉，那麼先來做一個小小的回顧，放心，他的出道年資很短，只是……protfolio卻水蛇春咁長。
現年27歲的馬天佑，在英國的London College of Fashion修讀fashion promotion，每年暑假都會返港到唱片公司做暑期工（冇錯是唱片公司，而非時裝公司），三年來已做勻三大唱片公司，畢業後回港成立製作公司Fame Glory，以下是重點，曾合作過的明星包括周杰倫、范冰冰、張惠妹、蔡依林、蕭亞軒、蔡卓妍、吳雨霏、容祖兒等，製作超過50張唱片封套，為金像獎及兩部電影做過形象設計及顧問。
不過，最近馬天佑多了另一個身份，剛簽約黎明的唱片公司成為旗下歌手，首作叫《搞破壞》，貼合本人的作風，不愛墨守成規，喜歡打破固有框框。雖然馬天佑在大學讀時裝，但他對音樂更有興趣，與自小在音樂世家浸淫下成長不無關係，母親、婆婆及舅父均唱京劇出身，而父親則擅長拉二胡。馬天佑揚言不會把自己界定為歌手，他強調：「我只係做緊一樣我好想做嘅嘢。」
黎明金句啱晒feel
談到合作契機，有次馬天佑在台灣工作結識了當地音樂人，大家一拍即合下製作了《搞破壞》這首歌，最初只本着玩票心態，但完成後覺得製成品不俗，後來馬天佑的公司為黎明導演的電影擔任形象工作，他便貿然地問黎明可否幫他的歌曲拍MV，對方聽完歌曲demo後一口答應，終促成合作關係。可能黎明的金句未必人人聽得懂，但馬天佑就跟對方十分投契：「我好鍾意同佢交流，佢畀我感覺好active，我鍾意諗嘢有好多可能性嘅人，佢喺創作方面好可以刺激到我。我哋嘅理念好清楚，就係唔做人哋做過嘅嘢，要做滿足自己嘅嘢，滿足到自己先去please大眾，唔好理人哋想你去做咩，而係自己想做咩，呢個好重要。」對於外界對其新歌MV的反應好壞參半，馬天佑不怕負評，就怕沒人講：「我嘅心態，最怕平平無奇，過關就算，網上負評冇問題，Justin Bieber有幾億個dislike咁係咪會影響到佢？我唔覺得。」
搵52位藝人玩嘢
講到老本行styling，經常強調要好玩的馬天佑去年底開始邀請藝人合作「玩」一個project，他為對方設計形象，並花一天時間錄歌、影相及拍片，他坦言：「喺香港時裝界中，有太多限制同束縛，香港人愈來愈懶得去玩，我要畀大家知道玩都可以有人睇，所以搵唔同單位嘅人一齊去玩一樣嘢出嚟。」目標是52位藝人，暫時完成17個，他甚至在facebook邀請跟他完全不認識的薛凱琪：「人哋係cold call，我係cold message，點知佢又答應喎！佢個人好坦蕩蕩，好玩得，另一個係（鄭）欣宜，佢提議以殺咗白雪公主嘅皇后做造型，佢話以前做白雪公主畀人笑，所以佢要做一個幹掉白雪公主嘅人，好有自信。」
黃夏蕙果欄影寫真
馬天佑常言道：「要做人哋冇做過嘅嘢！」創作有無限可能，但需要靠團隊，share大家的腦擦出新火花。馬天佑稱請人從來不看履歷，重要是醒目、反應快，他會問對方突發事件：「如果依家水浸你會點做？」之類。那麼反過來即場給馬天佑幾個名，要他為對方做形象，他又會如何回答？以下是他的答案：
一、張國榮演唱會：「我會將好有比對嘅嘢放喺佢身上，演唱會由一個最簡單，可能係一塊布做opening，之後愈嚟愈勁，encore嗰part嘅衫先係最勁。」
二、黃夏蕙影寫真：「嘩！正呀，我會同佢喺果欄影一輯相，佢畀堆西瓜圍住，好夏日feel，佢好有戲，可以誇啲，喺生果欄拎住個西瓜，着到好風騷，旁邊有一班壯男幫佢撥扇！」
三、汪明荃新形象：「之前同阿姐做過廣告，佢好肯試新嘢，我會畀佢着啲時裝系大學畢業生設計嘅好『啃』嘅衫畀佢着，啲衫仲係三年後先會hit嗰種。」
自揭萬六蚊創業
馬天佑認為創作可以天馬行空，但實行前要現實地考慮可行性，他舉例：「你要做太空人，咁你係咪識太空署嘅人？係咪要先去讀相關嘅課程？要好清楚每一步點做先達到自己嘅目標，再堅持就做到。但香港人唔習慣堅持，你好容易畀急速嘅社會推你走去另一條路。」那麼是否因為有家底，所以令馬天佑可以比別人更有條件去堅持？他強烈反對：「絕對唔係，我踏入社會後所有嘢都係靠自己。」並道出萬六元創業的故事：「我同吳雨霏係好朋友，有次我陪佢去唱片公司開會傾唱片，其中一個同事叫我幫手諗吓，我講咗啲意見，對方話OK喎，不如你試吓做，我當時O咗嘴，但有咁好機會咪試囉，做咗出嚟反應好好，開始有人留意，於是我決定搞公司，戶口得萬六蚊，我花咗六千蚊去做商業登記，之後請咗三個全職職員，嗰時冇辦公室，就日日去公園、咖啡室、健身中心唔同地方開會，月尾終於跑夠數，出到糧畀同事，隔多一個月，就喺中環開埋office，就係咁開始。」如果說吳雨霏是他創業上的貴人，黎明是音樂上的伯樂，但真正令他成功的是馬天佑本人。
馬天佑第一步是開製作公司，第二步唱歌，那麼下一步是甚麼？答案是甜品店，並已於八月頭正式營業，認真估佢唔到。
蛋糕也時尚
馬天佑是個甜品狂，開甜品店一直是他的人生必做清單內其中一項，最近他終於達成心願，在淺水灣The Pulse開設蛋糕店Vive。他透露花了一年時間作籌備，一年內不停試食蛋糕，投資少於十萬元，講到蛋糕賣點，竟然可以跟時尚拉上關係：「我覺得香港好少有fashionable嘅蛋糕，我將時尚元素融入蛋糕之中，令蛋糕都可以好fashionable同eye catching，每款蛋糕嘅造型都係我構思，由外形、顏色、甜味，甚至用嘅忌廉等等，我都有份參與。」
文：陳嘉敏
攝：劉斌
髮型：Sing Tam（pi4.ccom.hk）
Styling﹕Anton Mak
場地：東來順
服裝：House of Holland格仔恤衫、adidas外套、Frank Jerk帽、Blue Heros@D-mop牛仔褲、Decente運動鞋