陳家樂曬黑谷事業

藝人陳家樂昨於尖沙咀出席NATURE'S iSolari代言活動,他與穿Bra Top的性感女模合照時頓變怕醜仔,明顯「硬晒軚」,其後女模「倒奶」為家樂搽太陽油,令他直呼緊張。問曬黑了又健碩了不少的家樂是否刻意操Fit?他謂:「我不嬲有跑步,習慣夜跑,所以會又瘦又白,令人覺得我孱。最近嬲嬲哋轉朝早跑,熱到日日除衫跑。」

問外形黑實是否較易識女仔?家樂認為曬黑反而催旺事業:「識唔識女仔冇分別,反而多咗嘢做,白番就冇嘢做。(想做古天樂?)效法吓佢。(買曬燈機?)儲吓錢先。」再問可會找異性結伴做運動?家樂說:「我不嬲團隊式做運動,(去沙灘睇女?)忙到海水都未掂過。」