雨僑被男友忠粉催婚尷尬
藝人雨僑、石詠莉、周家怡、田雞等前晚為電影《猛龍特囧》擔任「香港網絡男神選舉總決賽活動」評判，大會邀請了雨僑緋聞男友羅力威的忠實粉絲劉馬車台上獻唱一曲《雙子情歌》，劉馬車表示：「我好鍾意羅力威啲歌。」他與雨僑握手合照時，即道：「我好鍾意威威，都好鍾意你，你哋好襯，希望快啲有情人終成眷屬。」雨僑尷尬當場只懂傻笑。
問到雨僑是否被劉馬車的歌冧到？她笑言「冧唔到，表達方式唔同，首歌係講花心。（羅力威唔花心？）OK啦。（粉絲想你哋結婚！）未有咁快。」而劉馬車獻唱時聲線與羅力威十分相似，可惜高音位一度失準走音。另外，參賽者9號鄧嘉傑最終脫穎而出奪得「網絡男神」獎項。同場藝人張建聲透露父親於上星期一因癌病逝世，痛失家人感到心痛，日後會更珍惜家人，婚後都要與母親同住。
