謝賢扯火怒摑曾江，當中因由、恩怨為何大家都想知道，《東網》就將事發過程、對答呈上，全片長4'28"（http://goo.gl/6GXFOt）原汁原味有得睇。
謝：「本來去旅行係好開心嘅事，但其中一個小生跛嘅，你知邊個啦！唔緊要，點跛法都可以照顧你，估唔到佢開工兩、三日就要坐輪椅，都唔緊要，但佢由頭坐到尾，中間我哋點照顧佢？感覺有啲玩弄我哋咁！尋日我睇到報道話佢流鼻血流四個鐘，X你老X！流四個鐘？你死X咗啦！」
曾：「係四個鐘呀！」
謝：「咁你唔死？」
曾：「我未死得呀！打完針停咗（流血）呀。」
謝：「咁你即係流四個鐘先打針呀？唔好講呢樣，你坐輪椅條橋係咪度出嚟呢？X你老X，要我哋成班人輪流推你。」
曾：「我都唔想嘅，大佬呀！」
謝：「但我知你唔係喎，我知你好X活躍喎！」
曾：「唔係，到依家我都係趷吓趷吓，如果咁好戲就不得了喇！」
謝：「總之我話你聽，我知道你個人多過佢哋。」
曾：「咁又係！」
謝：「你唔好喺我面前耍嘢！」
此時，曾江仍笑住食蛋糕，但謝賢突然企起身意圖出手掌摑曾江，懶理有大批傳媒在場，坐在中間的胡楓出手擋格，期間發生肢體推撞，胡楓眼鏡飛甩，並發出「唉呀」聲音，曾江的臉被謝賢摑到，助聽器一度撞甩，嬲爆的謝賢繼續發炮。
謝：「你尋日喺錄音室講過咩呀？」
曾：「我講過咩呀？我冇講過嘢喎！」
謝：「我錄音嘅時候，你話原本想早啲返屋企嘅喇！但畀人阻住晒！我哋四個好耐冇錄音，就嘰嘰趷趷，呀佢（曾江）喺度XX我喎，仲要行來行去，導演都叫佢坐番低，錄音唔可以有聲！」
曾：「有地氈嘅！」
謝：「有地氈都唔應該行。」
曾：「OK！咁點吖！」
謝：「尋日都想打你嘅喇，但喺無綫嗰度就唔打你啫！」
曾：「所以喺度打我？」
謝：「我邊度都打到你！」
曾：「你打我有咩問題吖！做咩咁衝動吖！」
謝：「拍嘢嘅時候唔緊要，做嘢吖嘛！一啲都冇表現出嚟，但我知道你，X你老X，要成班人顧你架三輪車，唔X使講，總之你以後唔好見我。」
曾：「唔好咪唔好囉！做咩咁衝動啫，唉！」
此時謝賢拂袖而去，走到一半時再回頭指向曾江說：「我要你知道呀！唔係個個可以畀你恰嘅！」留下三位小生在宴會廳，曾江笑說：「冇事、冇事，佢衝動啫！」而謝賢離開酒店上車時，繼續發表對曾江的不滿：「你哋有冇見過我咁發脾氣吖？呢個人唔咁對佢唔得，佢以為個個都可以恰，工作人員梗係啦，我唔得呀。」在場內的曾江仍保持笑容，表示與謝賢有多年誤會，拗撬不只一次，但從未試過動手，而今次做節目互窒只是想有更好效果，他再澄清沒有詐病，並有醫生紙證明：「你估病好過癮咩？今次係對大家嘅友情同關注多咗，如果冇病，只係四個人開心旅行，但依家係多咗啲嘢。」