傅嘉莉 陳逸璇 瀛人潮食
藝人傅嘉莉（Kelly）與歌手陳逸璇（Jolie）同是模特兒，兩人衣着品味毋庸置疑，原來飲食品味同樣勝人一籌，Kelly日前相約好姊妹Jolie到位於荷李活道的THREE MONKEYS這間富英倫格調的Gastropub，一邊品嘗精緻的日式料理，一邊把酒談心，食出「瀛」味。
傅嘉莉與陳逸璇平日各有各忙，日前難得聚首，向來識飲識食的Kelly，特別帶Jolie來到位於荷李活道的THREE MONKEYS吃喝一番。THREE MONKEYS是一間既有美酒，也有高級佳餚的Gastropub（酒吧餐廳）。甫進店內，Jolie見到充滿英式風情的裝潢，還以為是一間英式酒吧，但可別被外表騙倒，仔細發現店內置有收藏了不少日本酒的酒櫃、專門用來製作串燒的烤爐，以及日本報紙造型的餐牌，餐廳供應的可是日式料理呢！
豚蝦鮮味交錯
兩人點了數道特色小菜，包括巴馬火腿沙律、黑豚蝦卷、雞頸肉串、煙肉芝士卷及鵝肝豆腐多士，大快朵頤。Kelly十分欣賞巴馬火腿沙律這道菜，笑言可一次過滿足三種味覺，她說：「Parma ham啲味鹹鹹哋，沙律醬酸酸味味，加埋入面嘅果凍甜甜哋，一啖已經有三種味道，加上沙律又夠晒高纖，女仔食都唔會Heavy。」至於愛好海鮮的Jolie則鍾情黑豚蝦卷，吃畢即讚不絕口：「嘩！原來蝦同黑豚肉係咁夾嘅，黑豚肉仲將蝦嘅鮮味帶出嚟添！」而另一款煙肉芝士卷亦令Jolie喜出望外，一啖咬下，澎湃的芝士即時流出來，滿嘴芝味無窮。
雞頸肉反傳統
講到驚喜，Kelly首推刁鑽的雞頸肉串：「豬頸肉就試得多，雞頸肉真係未試過，原來係特別有雞味，仲有好濃嘅油脂香，肉質又爽口。」當然鵝肝豆腐多士亦不得不試，沾上天婦羅漿後炸過的豆腐外脆內軟，淡淡的豆香配合味道香濃的鵝肝，一淡一濃，配合得恰到好處，Kelly也畀Like：「豆腐甜甜哋，仲好有香蒜味，塊鵝肝比平時食嗰啲更加香呀！」美食不止單純的滿足口腹之欲，更能為聚會錦上添花，令人留下美好回憶。
東洋食尚：鵝肝豆腐多士 $88
廚師專業分析：「呢個菜特別之處係用咗兩日時間製作嘅秘製醬汁，所以豆腐採用天婦羅方法炮製，令豆腐表面可以將醬汁完全吸收，而鵝肝來自匈牙利，同法國鵝肝一樣入口即溶，但冇法國鵝肝嗰種勁羶味，對香港人嚟講更易入口，鵝肝煎好後會再用秘製醬汁去煮，再加入之前煎鵝肝嘅油，味道就更加香。」
黑豚蝦卷 $88兩件
廚師專業分析：「以美國黑毛豬腩片，包裹被譽為蝦界松露嘅澳洲藍尾蝦，咬開口感彈牙嘅黑毛豬腩片，就等於拉開鮮味炸彈嘅保險裝置，藍尾蝦嘅鮮甜味就會喺口腔內爆發。」
巴馬火腿沙律 $158
廚師專業分析：「巴馬火腿以肉質柔軟見稱，而24個月的巴馬火腿不會太鹹，用來製作沙律最合適不過，同時加入果酢做的果凍以平衡火腿的鹹味，配合芝麻沙律醬，兩種不同的酸味更能帶出沙律的甜味。」
煙肉芝士卷 $45
廚師專業分析：「芝士採用法國最有名嘅白黴芝士，係法國皇帝拿破崙三世食過後大讚，並親自命名嘅Camembert Cheese，質地柔軟帶鹹味，同煙肉一齊燒就最夾。」
雞頸肉串 $38
廚師專業分析：「每隻雞只有極少嘅雞頸肉，雞頸肉除咗珍貴外，肉質比一般雞肉更有彈性，以及擁有更豐富嘅脂肪香。近年大家食雞都特別關心健康同衞生，我哋採用嘅雞頸肉係來自有衞生保證嘅日本愛知縣，令大家食得開心又放心。」
雞尾酒
所謂美酒佳餚，有美食又怎能沒有佳釀，THREE MONKEYS的酒櫃藏有逾百款名釀，當中以日本酒為主，還有調酒師製作特色Cocktail，Classic Cocktail超過20款，Signature Cocktail也有逾15款，滿足客人不同需要，調酒師Kofei特別推介幾款精選Cocktail。
1. Hayley Berry $98
採用伏特加酒、榛子味酒、鮮檸檬汁、蛋白、糖漿、新鮮士多啤梨及紅桑子調製，帶有濃濃果香，甜中帶微酸，非常開胃，酒味較淡，尤其適合女士飲用。
2. Kaffir Margarita $118
以浸泡了日本指天椒及辣椒的龍舌蘭酒、龍舌蘭糖漿、青檸汁與檸檬葉製成，入口酸而辣，味道恍如酸辣湯，非常刺激味蕾。
3. Smoky Nikka Sour $158
採用Nikka from the Barrel（日本威士忌）、鮮檸檬汁、蛋白、糖漿和苦艾藥，並以煙槍加入蘋果木香味的煙熏入酒，飲品味道偏酸，並帶有煙熏味，口味獨特，令人一試難忘。
經驗主廚崇尚鮮原味
THREE MONKEYS的主廚郭師傅看來年紀輕輕，但入行已經十八年，經驗老到。郭師傅以傳統的日式料理加入西式元素作出突破，為味蕾帶來驚喜無限。除了配搭及菜式設計考心思外，餐廳對食材同樣重視，從世界各地搜羅高級及優質的食材，每日新鮮運到，例如匈牙利的鵝肝、美國黑毛豬、澳洲藍尾蝦、日本愛知縣的雞頸肉和法國白黴芝士等。而為保留食物的原有鮮味，郭師傅不主張添加太多調味料，故選材上尤其要求嚴格謹慎，以求食落啖啖新鮮。
「飾」心落腳點
餐廳鄰近全新地標「PMQ元創方」，附近還有不少特色小店，吸引潮人聚集。兩層高的餐廳以黑色為主調，配合落地大玻璃、散發着暗黃光芒的鎢絲燈、木質材料及後現代味道的畫作裝飾，充滿英倫風格，型格十足，但同時滲入「瀛」味，最特別是以日本報紙為造型的餐牌，而菜式名稱更採用日文拼音，每道菜的食材並會用英文列明，就算不懂日文也大可放心。
餐廳名稱：THREE MONKEYS
地址：上環荷李活道151-155號地下
查詢電話：31517771
開店時間：平日17:00、周末及周日14:00
文：陳嘉敏
攝：張福宏
服裝：French Connection@I.T（陳逸璇）