連詩雅獻醜 搣甩小學雞
歌影雙線發展的連詩雅（Shiga）於娛樂圈打滾五年，但仍自覺是「小學生」，要待開了個人演唱會，才算正式畢業，更渴望擺脫「花瓶」的影子，放下偶像包袱演醜女，成為一個全能藝人。
毋忘初衷 圓個唱夢
以歌手身份出道的Shiga，雖然已在樂壇打滾五年，但她仍謙稱自己處於「小學生」階段。不過她一直毋忘初衷，最近積極籌備新廣東唱片，並期望於三年內完成個唱夢。
「其實我真係好慶幸可以做到自己鍾意嘅工作，又可以養活到自己。我依家籌備緊廣東唱片，有慘情歌，又有輕快嘅歌，遲啲都計劃推出國語碟，希望令到內地更加多人認識我，不過香港係我主線。而我目前嘅目標，係希望可以喺star hall或者紅館開騷，始終未開過屬於自己嘅演唱會，就好似仲讀緊小學或者中學咁，仲未畢業。最初我入行嗰陣，我希望自己喺八年內開個唱，依家距離限期仲有兩、三年時間，希望能夠做到啦。
如果將來有機會，我都想試吓邊唱邊跳舞，畀觀眾視覺同聽覺嘅享受，所以我依家都學緊Girls Hip Hop、Jazz同Funky Dance，希望有朝一日能夠大派用場。」
跑出香港 首戰半馬
Shiga亦投放很多時間於她組成的美女夜跑隊「My Girls」方面，近日她更加積極練跑，為年底到海外參與人生中首次半馬拉松賽事作好準備。
「基本上我依家啲時間都係用嚟做運動，因為工作需要，要好好注重身形，要keep fit。加上我年底會代表運動品牌，去海外參加半馬，真係好緊張，好大壓力！因為我未試過跑咁長，平時跑十公里，係可以靠意志完成賽事，但係半馬一定要接受訓練，好似肌肉嘅支持，心理同生理因素等等。
我依家每星期都會跟教練上一至兩堂，每堂兩個鐘，私下得閒嗰陣都會練跑，暫時我最長都係跑十三公里，距離半馬差唔多一半路程，依家剩番唔夠半年，真係要好好訓練，唔可以辜負大家對我嘅期望。」
放下偶像包袱 挑戰醜女
Shiga出道不久即憑《喜愛夜蒲》系列電影彈出，早前主演三級電影《野狼與瑪莉》，亦以女神形象現身，彷彿所有角色都被定型是「美女」，但她卻從不覺得自己長得漂亮，謙稱全是衣着打扮的功勞。
「首先，我唔覺得自己好靚，我嘅外表能夠去到正常水平，可能係靠衣着打扮幫手，同埋可能我生得高同瘦，所以先畀人呢個感覺。其實呢一、兩年，我拍嘅電影角色除咗有靚女嘅外表之外，裏面都包含咗唔同嘅挑戰，好似要做到性格好粗魯、粗獷，又或者有打鬥、殺人同被殺場面咁，其實都好有挑戰性，我都好開心有唔同嘅發揮。
不過拍戲始終比較被動，係人哋覺得你適合嗰個角色先會請你去演。其實我都好期待演醜女角色。我鍾意拍戲，係因為演戲嗰陣可能變成另一個人、試唔同嘅嘢，要完全放下偶像包袱。」
文：龔凱欣
攝：張福宏
髮型：Kate Shek @ Hair Culture
場地：Djiboutii