朱慧敏人月兩圓復合在望
藝人朱慧敏早前與男友彭懷安（Eddie）感情亮紅燈，更將對方降呢為生意拍檔，但昨晚她透露將與對方共度中秋，人月兩團圓，復合有望；另外，工作上她又為中學拍攝電影，看來事業與愛情同向前跨大步。
朱慧敏昨晚以透視斜肩晚裝現身海外學生仁濟夜2015慈善餐舞會，之前Eddie被拍到夜會索女而遭朱慧敏煞停婚事及降呢成為生意拍檔，不過，最近Eddie因意外傷手入院做手術，朱慧敏緊張探望，有指兩人假分手，對此，朱慧敏表示：「佢有事我緊張都好正常，佢係我嘅生意夥伴、好朋友，喺公司有見面，依家就快中秋做緊月餅推廣。（會唔會人月兩團圓？）每年都會同公司同事食飯過節。（咁係咪真係分咗手？）感情事低調，順其自然，依家專注工作。」
拍戲收慈善價
朱慧敏透露早前為仁濟屬下中學拍攝電影，大讚有意義：「由學校老師做導演，學生負責拍攝，好開心，感覺重返校園咁，我喺套戲嘅角色係媽咪，要演繹20、30、40歲，挑戰好大。（有冇酬勞？）有，但係收慈善價，可以鼓勵吓下一代，所以唔會計較錢。佢哋2月已經搵我，因為當時我拍緊《愛．回家》，佢哋等到我5月，啲同學仔同老師都投票想我做呢個角色。」對於新一輯《愛．回家》反應未如理想，她認為觀眾需要時間慢慢適應。
林欣彤恨拍拖
另外，歌手林欣彤擔任表演嘉賓，早前她被《好報》拍到與四眼男在街頭談心，她否認對方是新歡：「佢係我朋友嘅老公，真係唔好意思，但相信阿嫂唔會嬲。（有冇拍拖？）冇呀！我都好想，但呢啲嘢冇得強求，（有冇追求者？）冇呀！邊有咁好。」是晚出席嘉賓者眾，包括有名人王賢訊夫婦、林煒珊、港姐邵珮詩與何艷娟、藝人徐肇平、高鈞賢、歌手胡鴻鈞等。
文：名人組