Hilary黐住媽咪 臨別大血拚

轉行從事保險業的前藝人上山詩鈉，母兼父職湊大女兒，自細和王菲女兒童童玩到大的Hilary，現已18歲，長得亭亭玉立，樣貌標致又有禮貌，近期頻頻亮相，成為受傳媒注目的星二代美少女。

熱褲上陣吸睛

Hilary早前透露將於本月到美國升學，離港在即的她近日孝順地陪媽咪，前日兩母女結伴往中環shopping，她們先往名店睇鞋，齊齊試不停，火速各有收穫，Hilary主動幫媽咪拿取大袋戰利品。以熱褲上陣的Hilary，露出一雙美腿，雖然略嫌稍為多肉地圓碌碌，但勝在笑容甜美，加上一頭飄逸長髮，沿途引來不少男途人對她眼望望。

Hilary對護膚品很有興趣。	兩母女一齊睇首飾。	18歲的Hilary，樣貌標致，在商場逛時甚受注目。（ＤＶ圖片）

兩母女冇代溝

兩母女行完名店再去選購護膚品，兩人有傾有講，不時交頭接耳地研究產品，離開時發現記者拍照，上山及女兒均禮貌地笑晒打招呼，然後再到附近首飾店睇珠寶，逛了約一小時左右，已買到一袋二袋，兩母女同樣愛購物，零舍啱傾，完全不會有代溝！只見她們行到攰，拖實前往餐廳搵位坐低醫肚，叉完電又再繼續掃貨。

文、攝：追蹤組