黑面飛融

排練舞步配合

另一首《Diamond Cat》係快歌，我鍾意一快一慢嘅形式，可以滿足唔同歌迷嘅口味，呢首歌玩味重啲，都係做番自己，因為《黑面神》都幾沉重，呢首輕鬆，咁可以平衡番。快歌當然會配合跳舞，我一向都鍾意跳舞，所以排舞時會參與意見。好多時我喺網上睇有跳舞嘅MV，見到自己想跳或覺得好靚嘅，都會同跳舞老師傾，睇吓做唔做到，我都會放跳舞片上網同粉絲分享。

依家最想學拉丁舞，一直覺得拉丁舞好靚，以前個個表演都要跳，但依家返工冇時間，所以好懷念讀書時成日安排好多嘢學，但又唔珍惜，依家好後悔，因為出嚟做嘢就無咁多時間可以做自己想做嘅嘢。

放大圖片	鄭融對事業重新開展很期待。	林盛斌（右）有份投資的娛樂公司年初宣布成立，當時旗下的鄭融（中）亦有出席發布會。

每月出兩首歌

好開心加入新公司棋人娛樂製作（香港），好鍾意佢哋嘅形式，會安排唱歌老師同跳舞老師畀我，所以花好多時間喺錄音室，一有時間就返公司練習，繼續進修同增值自己。唱歌形式係每隔兩個月推兩首歌，係刺激同埋充實，以前出碟時，一、兩個月錄七、八首歌，只有兩、三首主打，其他嘅好浪費，依家變咗每首歌都係主要，時間分配亦好啲，唔係谷喺出碟嗰段時間，全年都有歌出，最開心可以同一直合作緊密嘅音樂人重新開始做音樂。

在電影《關人7事》中，鄭融（右）與陳楚喬有大膽戲份。	2006年鄭融曾憑《紅綠燈》一曲奪過不少大獎。	舞功了得的鄭融希望學拉丁舞。

我啱啱推出嘅《黑面神》係慢歌，好有挑戰性，係我錄音以來花最多時間準備，題材好真實。我嘅性格成日被人評論，依家嚟到新階段，自己成熟咗，係好機會走進呢個題材。首歌歌詞講凡事未必每日都順利如意，我係公眾人物，發生喺我身上嘅「黑面事件」啲人會放大。其實黑面係個面具，有時做嘢辛苦又有壓力，自己唔識點面對，迫不得已放喺面上，結果變成焦點。我弱點係怕修飾，因為唔想做到咁假。今次我唱出自己心聲，當你搵到自己方法面對，豁然輕鬆啲，將自己最低嘅一面同大家分享，就會輕鬆啲。

跑步尋找真我

除咗唱歌，我都希望向其他方面發展，拍電影、真人騷都想挑戰。依家睇緊合適嘅劇本，做好準備等合適機會。不過，都係以音樂行先，最想重新成立歌迷會，好多嘢想同歌迷分享，例如自己嘅情感同心得，因為《黑面神》第一次試真實題材，依家好多歌都會喺生活體驗中搵靈感。

簽新公司仲未有半年，早前有段時間冇見大家，令我有時間沉澱自己。我用好多時間做運動，跑馬拉松，同好多朋友一齊跑，去試做新嘢，再持之以恒，由跑五公里變十公里，好興奮，所以人需要有事情發生先懂得欣賞自己，以前有段時間突然少咗出歌機會，唔知點算，於是學習搵方法照顧自己，跑步係其中一個方法，所以我會一直跑落去。

後記：未想結婚

30歲的鄭融與男友拍拖五年，感情穩定，已視男友為另一半的她未有計劃結婚：「未有呢個衝動，自己沉澱嗰時，原來生活上有機會去進步，去認識自己能力，對生命好重要，但當時都冇諗過不如就咁結婚就算。（有冇計劃？）唔想去計劃，我唔係好浪漫嘅人，順其自然。同一個人一齊已有一段好長時間，過程中大家建立信任，變成家人，隨着另一半嘅步伐行，雖然都要有小朋友，但唔會為需要做而做，要處理好自己先，當對自己有信心，認識自己時，先會有下一代，未做完自己嘅嘢就話生，未必教育到。」

場地：Djiboutii

文：Jessica Lam

攝影：吳文聰

髮型：Zing Wong@Hair Culture

化妝：Janice Tao@Zing The Makeup School

服裝：十舍10theshop.com