Chilam視力衰退 搣甩電子產品

張智霖（Chilam）咋日與新婚不久的林夏薇出席護膚品牌新店揭幕活動，兩人在五月中時曾合作拍攝床品廣告，Chilam到場後立即祝賀對方升格為「人妻」，又互相分享不少夫妻相處之道！

承諾放低三個月

Chilam表示一向非常注重眼部健康，因長期使用電子產品，坦言視力衰退得厲害，承諾搣甩電子產品三個月：「畀電子產品荼毒咗好耐！以前睇書都會有休息時間，依家休息都拎部電話出嚟玩，根本冇休息過！」他坦言與屋企人相處上也開始出現問題：「依家趨勢每個人返到屋企，都揸住部電話或者平板電腦，反而冇咗溝通，想保留同屋企人傾偈嘅融合！（囝囝都成日玩？）都多！好難，係一個趨勢，家庭溝通好重要！我承諾先放低三個月，自己視力好差。（有冇出現老花？）唔知，個仔依家冇近視，但再係咁就會有！」

張智霖與林夏薇大讚現場的小女孩可愛。

林夏薇獨個兒到機場，表示回家探親。

左兜右撇到機場

而林夏薇新婚後首次亮相公開場合，期間不時洋溢出幸福甜笑，對於上周六秘嫁44歲金融才俊Jason，於山頂一座超級豪宅低調舉行婚禮，她透露與老公拍拖兩年多，一直也有結婚的打算，而婚禮籌備了只有短短兩星期：「我最開心係啱嘅時間遇到啱嘅人，然後做啱嘅事！（雙喜臨門？）我自己都想！我同先生都好鍾意小朋友，但各有各忙，依家想享受二人世界先。」

對於老公被指有20億身家，她坦言不想因自己藝人身份，影響了家人的工作和生活，亦未有考慮淡出娛圈工作，現時專注工作連蜜月也未有時間計劃：「佢同我都係靠自己努力，一步一步行，所以佢唔想因為其他事影響到佢工作。」問到老公是否送上價值三千萬的西貢匡湖居物業作為結婚禮物？她看似不願多提：「所有關於屋企嘅任何嘢我都唔答啦！想保護屋企人，唔想佢哋受到任何干擾！」活動後，她乘座駕離開，期間不停兜圈，未幾更駛往酒店，林夏薇帶同行李入內，15分鐘後以為撇甩記者，座駕再駛回接她，登車後又再兜轉，及至知道無法撇甩記者，唯有直駛機場，臨入閘時問到去邊，她說：「返屋企探家人，（老公呢？）佢好忙，唔同我一齊飛。」

文：名人組