Dear Jane 恨港鐵開騷

入行12年的樂隊Dear Jane過往曾於大大小小的場地開騷，他們於8月7日將任「#HennessyBandTour」音樂派對表演嘉賓。四位成員對在酒吧開騷感非常親切，因為可以與觀眾拉近距離。低音結他手Jackal說：「喺酒吧開騷如果觀眾睇得high high哋，可以飲兩杯，成個氣氛會好好。」

天台觀眾坐石壆

雖非首次開酒吧騷，但四子仍充滿期待。問到過往特別難忘的開騷場所，結他手Howie透露曾於天台表演：「有次喺上環一幢大廈嘅天台玩音樂，嗰日都幾多人，但係幢樓係好舊好窄，有啲觀眾聽聽吓唔知點解仲坐上石壆，但係石壆後面已經冇任何保護，我記得嗰次自己一路彈一路為觀眾擔心。」雖然緊張，但Jackal就笑言是Dear Jane的音樂，將觀眾由石壆邊緣拉住！而對鼓手Nice而言，最難忘是在雨中的旺角街頭騷，他記得曾有位孕婦觀眾，完騷後特地走過去表示很喜歡他們的表演，當時非常感動。

雖然Dear Jane做過大大小小的騷，但仍有天馬行空的開騷念頭。Jackal說：「有個地方我好想試，但應該無乜可能，就係港鐵站月台。如果可以想喺機鐵站開騷，因為個樓底好高，我見過有外國樂隊可以喺啲樓底好高嘅火車站開騷，我覺得好似幾得意。」而Howie則表示：「我有個雖然唔係好天馬行空嘅諗法，但又真係未試過，點解唔可以租隻船開騷呢？睇完仲可以同啲觀眾一齊游水！」

九月個唱多嘢玩

Dear Jane之後的工作排得密密麻麻，完成酒吧騷後，今個月會有新歌派台，緊接九月又會開演唱會。主音Tim透露已初步構思好個唱主題，歌單亦有大概心水：「其實到最後，係想嚟睇騷嘅觀眾可以有個開心嘅晚上，我哋同佢哋一齊玩，中間有一部分我哋略略傾過，係須要大家好多郁動同耐力。」不過Tim話現時先賣關子，而四位成員都表示正積極為開騷操fit練氣，叫大家拭目以待！

文：專案組

攝：張福宏

場地：TIMES

髮型：Jamie@Hair

化妝：Cierman

服裝：Musium