藍奕邦重振sing威 攜師妹登紅館
受頸患困擾大半年的藍奕邦成功戰勝病魔，即將全面復工在紅館開騷，在養病期間除了游水減肥之外，更相約一班「雀腳」苦練游乾水技術，並向兩位小師妹Robynn & Kendy下戰書，決戰四方城！
王菀之、藍奕邦、側田、羅力威及Robynn & Kendy（R&K）將在8月30日假紅館舉行「Summer Pop Live in Hong Kong 2015」，當中以邦邦與R&K最為有緣，因他們由同一位恩師提攜入行，最後更齊齊加入環球大家庭。邦邦大讚師妹：「好有才華，同埋兩個都好有禮貌，有啲比我細個嘅朋友，成日嘈喧巴閉，佢哋比較安靜同乖。」
去年尾飽受頸患折磨的邦邦休養大半年後，即將正式全面復工。提起患病期間的苦況時，邦邦仍有餘悸：「舊年頸嘅痛症引發一連串嘅健康問題，例如失眠，嗰時好驚事業會完，因為最痛時直頭歌都唱唔到，搞到自己亂諗嘢。好彩依家好番七七八八，算係久休復出。」
訓練賭術
在養病期間，陪伴邦邦的除了一班朋友，還有一副功不可沒的「麻雀」：「我發覺有一樣消遣令我大半年愉快咗好多，就係打麻雀。要多謝填詞人梁柏堅同佢表弟，成日陪我打牌。」問到R&K可會與邦邦大戰四方城？她們大爆在內地登台時，不時被五位師兄Mr.訓練賭術：「我哋唔識得數番，只識食雞胡，但我發覺Mr.係好鍾意鋤大Dee，成日會輸畀佢哋。」
增十多磅
可是因長期服用止痛藥，令邦邦暴脹十多磅，所以邦邦近日積極游水減肥，希望踢走至少5磅脂肪，將最好送給觀眾。至於R&K表示想唱出香港情懷，盡快在紅館舉行屬於自己的演唱會：「我哋目標啲人認識我哋，唔係因為翻唱，而係原唱，同埋希望上到台要利用舞台嘅氣場吸引其他人。」
文：音樂組
場地：九龍廳