鄧愛嘉 還以犀利顏色

「睡衣衫身繡咗『do not disturb』字樣，哈哈，好多產品都係可以繡名，男人可以用繡咗名嘅袋巾，用袋巾嘅男人紳士啲，我老公都有用；呢啲床單繡咗十二生肖圖案，做結婚禮物唔錯；仲有BB禮品，一家人入到嚟，大家都買到嘢！」Victoria在店內逐一介紹每件家品，對店內產品瞭如指掌。「呢啲雨遮上面印有烏蠅、曱由同埋蚊嘅圖案，有啲人好驚昆蟲，落雨擔住呢把遮，嗰啲『烏蠅曱甴』（討厭嘅人）自動行開，冇人會逼埋嚟，哈哈。」

為父打工經常有爭拗

曾祖父是大慈善家鄧肇堅，父親是香港名流鄧永鏘，貴為名門之後，Victoria不像典型淑女，她說話直率，雖然老闆是父親，她卻抱住打工仔心聲，經常與父親爭拗角力：「佢其實唔想我嚟幫佢手，可能我成日問點解，佢聽到我問就嫌我煩，我哋乜都拗，我唔會係yes sir嗰啲人，我哋拗完第日就冇事。好似我同佢講唔好再出煙灰缸啦，依家啲人注重健康，唔係廿年前，佢就話廿年前出煙灰缸好成功，咁冇法子啦！仲有，我覺得唔應該再出床單同相簿，床單好多人已經有好多套，相簿亦已少人用，可以改為出日記本，畀人貼相畫吓公仔。（Daddy對你工作滿唔滿意？）唔知，我哋好少坐低傾，佢大忙人，多事忙，請你係幫佢處理事。」

父女情深	夫妻恩愛	床上用品

讀完書做家庭主婦？

上年11月Victoria與英國籍律師男友Christopher Owen結婚，而婚後的她對父親有所不滿：「佢重男輕女(口架)！成日話女仔結咗婚就得，做家庭主婦，但我覺得可以貢獻多少少，如果唔係畀錢我讀書做咩？依家啲女仔不知幾犀利，女仔犀利過男仔，好多男仔好hea，有啲返工又得唔返工又得，我就唔會突然唔返工。」她工作時全神貫注，曾試過連續工作通宵三四晚，顛倒日夜，是想給父親證明實力？她說：「做畀自己睇。」問到幫父親打理生意，酬勞如何？她直言不是為錢而工作，是希望將家庭生意繼承下去。

家居精品市場有潛力

畢業於Saint Martin's University的Victoria，對於女士至愛的時裝，她當然喜歡，但覺得做時裝的人太多，她認為每個人都有家，卻不是每個人也是室內設計師，有能力粉飾家居，故深信家居精品店大有市場潛力，她對公司的定位，舉例說：「有品牌知道自己做皮革最好，就專做皮革，但依家出面有好多品牌，乜都想做，搞到好似雜貨舖，其實係失咗自己方向。（你哋嘅方向？）就係爸爸鍾意嘅嘢，靚又價錢平嘅，可以mix & match，爸爸屋企就係用緊呢度嘅產品。」她說到訪別人的家，可從而了解對方多一點，她說曾到訪一個友人家，發現友人連一張家庭照也沒有，感覺他像住在酒店一樣，她說：「屋企可以反映真個性。」

撰文：Tracy Leung

攝影：劉智源