任達華人肉遞速餅慰全智賢
任達華獲韓國影展之邀，親臨當地與影迷會見，期間他不惜長途跋涉驅車前往首爾，探望電影《盜賊門》的舊拍檔，且「人肉速遞」為剛宣布有B的全智賢送上最愛的杏仁餅。有指，《盜》片導演有意原班人馬再合作，相信等女神生完B至可以成事！
近日忙於在內地拍戲的任達華，日前特意抽空數天，出席「第19屆富川國際奇幻電影節」。大會對他的到來相當重視，影展期間推出「任達華回顧展」，播放5部其主演電影包括《歲月神偷》、《迷離夜》及《PTU》等。他笑說：「雖然語言唔通，但估唔到佢哋睇《迷》片，齋睇字幕都嚇到尖叫。」
密謀再合作
任達華此行還特意飛車往首爾，與《盜賊門》拍檔金海淑、吳達秀及導演崔東勛等飯聚，席間言談甚歡：「因為時間關係，我留得半個鐘咋，最緊要係我要帶啲杏仁餅畀佢哋，全智賢最鍾意食嘛！（再傾合作？）導演套新戲《暗殺》就嚟上映，佢叫我留低出席首映禮，但我個期唔得，佢就話等佢忙埋宣傳，會坐低諗劇本嘞，我覺得大家好快會再見囉！」
毋須戴口罩
談到當地之前的新沙士疫情，任達華表示：「情況已經受控嘞，我喺當地都冇戴口罩。佢哋有同我提起香港喺呢方面嘅處理手法，我就充當和平大使，同大家解釋清楚，希望兩地嘅旅遊業交流會復甦番啦！」
文：影視組