林欣彤唱走抑鬱自勉
成功走出抑鬱陰霾的林欣彤（Mag）無懼勾起患病的痛苦回憶，更決定在新碟中擺自己上枱，大方跟歌迷分享自己的成長經歷。身為歌手當然想一登紅館開個唱，熱愛唱歌的她亦期待能一圓夢想！至於屬單身一族的Mag雖剛踏入25歲，但她直言不恨拍拖，更謂：「太倉卒唔係好事！」
歌手林欣彤（Mag）最近推出首張EP，一直出開大碟的她坦言因EP較少歌，故主題可更集中。今次EP的主題是成長，歌曲所講都是Mag的個人經歷，如《金剛圈》和《小花》是與她早前患抑鬱症有關，其中《金剛圈》更是講嫲嫲衰老患腦退化症及中風，但Mag仍努力追夢，慚愧自覺丟棄了嫲嫲，因此寬恕不到自己而患病：「覺得令嫲嫲好唔起嚟，以為放慢步伐係陪緊佢，但其實嗰陣我逼到自己有情緒病。」幸好最後被真愛拯救，才能走出抑鬱症陰霾。
曾害怕探嫲嫲
講到嫲嫲現時身體狀況，Mag自爆有段時間曾害怕探嫲嫲：「因為覺得佢唔同咗，但依家覺得佢都係一樣，只係好似變番個細路仔咁，佢依家雖然都係講唔到嘢，但健康穩定嘅。」
講到一手包辦曲詞的《小花》，她表示該曲隔了很久才完成，頭一半是患抑鬱症期間創作，當時她感到跟世界脫軌，覺得世界容不下她：「嗰陣每日喺屋企都好唔開心，唔想成首歌都係咁，於是寫到一半停低咗，我想有一日有出路先寫埋佢。」而後一半就終於在幾個月前完成了，已成功戰勝病魔的她坦言：「睇番之前嗰啲詞，發現自己咪就係嗰朵小花，嫲嫲就係小花隔籬嘅一塊枯葉，佢曾經喺樹上努力求存，跌下亦非隨便，就算佢跌落嚟最後都會成為我嘅養分。」
唔敢諗拍拖
出完碟自然會想舉行音樂會，Mag坦言自己都不例外，不過最想舉行的當然是個唱，那可想登上紅館開個唱圓夢想？她甜笑說：「好期待有呢日，但暫時冇定幾年內做到呢樣嘢，自己prefer順其自然。」至於講到21號剛踏入25歲，貪靚的她坦言生日願望是青春常駐和健康：「希望個樣keep住係咁嘅年齡，二嚟希望開心健康。（想快啲拍拖？）冇得咁諗(o個)，太恨件事會夾硬，太倉卒唔係好事。」
文：音樂組
攝：劉智源
化妝：Miko Wong（Cyrus Lee Team）
髮型：Ritz Lam＠Hair Corner