鄧麗欣 方力申每天愛你多一些

做藝人平時忙到甩轆，回到家中最開心總是視如己出的貓貓和愛犬氹你、嗲你。今次《東網巨星》「巨星最愛：寵物篇」，一眾藝人分享養寵物的點滴。「模範情侶」鄧麗欣和方力申更不約而同大講心中最愛就是自己的貓狗，鄧麗欣說：「我嘅最愛就係屋企隻狗狗年糕仔喇，因為佢成日個樣都奸笑啦，個嘴側埋一邊，個樣又好傻，同埋我每一次做完嘢返到屋企，喺上樓梯嘅過程佢就會好sweet咁喺樓梯口側住個頭、咬住個骨頭咁等我返嚟，呢個畫面就係我每次放工返屋企最期待嘅一個畫面，令我個人好開心啦，每次返到屋企就會同佢玩一陣，令我心情都放鬆好多，所以佢一定係我永遠嘅最愛！」

年老唔捨得

至於男友小方則說：「我最愛絕對係我屋企嘅兩隻貓喇，叫BB同肥妹，咁點解呢，其實佢哋兩個年紀都大口架喇，都成十二歲，亦都有病啦，我成日都驚佢哋時日無多，所以都要多啲時間去陪佢哋，同佢哋玩，影多啲相咁樣！佢哋亦都係我由細到大第一次親手養大嘅動物，所以對佢哋嘅愛會更加多，同埋更加唔捨得嘅！」

方力申爭取時間陪伴年老的愛貓。	鄧麗欣愛犬年糕識奸笑！	雨僑希望愛貓能陪她終老。

漏夜睇醫生

歌手雨僑亦高呼她的最愛就是她的貓貓，巴不得與愛貓一生一世：「我最愛就係貓仔叉燒，由我出嚟做嘢陪到依家，陪我度過好多難關同重要時候，因為佢好可愛同體弱多病關係，所以對佢付出嘅關心係比較多啲，試過有次佢差啲死，我直情成個癲婆咁抱住佢漏夜睇醫生，如果佢能夠陪我去到一百歲就好喇！」前港姐湯洛雯則說：「我最愛就係我隻貓貓boy boy，因為佢喺我唔開心嘅時候陪住我，又唔會因為有嘢食先黐住我，係真係好鍾意我，所以我都好愛佢。」

文：專案組