Mr.向RB挑機紅館兜亂Jam
樂隊Mr.和RubberBand（RB）8月將在紅館為「Summer Pop香港夏日流行音樂節」開騷，因兩Band曾傳不和，昨日Mr.在記招直認與RB不和，並藉今次兩隊台上「大兜亂」，與「冇乜兩句」的RB成員夾Band擦出火花。
Mr.、RubberBand（RB）、羅力威、藍奕邦、側田及Robynn & Kendy昨日為音樂節出席記者會，講到兩隊Band曾傳不和，可擔心兩派歌迷相遇？成員Dash謂：「兩邊fans都大個晒好成熟唔使擔心。」在旁的Tom則笑指泥鯭打鼓成日分心，只顧望台下！
Tom：泥鯭打鼓唔專心
主音Alan指到時兩隊會大兜亂調換崗位夾Band，更直認和RB不和：「咁牽涉咁多人實有啲不和，或者我哋會同RB唔係咁傾得埋、冇乜兩句嘅成員一隊，睇吓出嚟效果好唔好囉！」對被Tom指不專心，泥鯭笑言：「我係專心留意台下觀眾反應同周圍舞台機關。」成員阿偉亦笑他是「(目及)女」，泥鯭自辯說：「當年參加婚禮表演，個個掛住睇靚女彈錯晒，唯獨我冇出錯。」
至於Mr.對MV臨時飛起王宗堯做導演，Tom稱絕對與政治無關：「音樂歸音樂，唔好將我哋Mr.音樂同政治掛鈎。」Tom稱起初好粗略講點拍，未有正式分配崗位，王宗堯好支持為MV給予不少意見，MV會繼續用他介紹的團隊拍攝，並強調事件不會影響友情。
羅力威心痛雨僑受傷
而羅力威對於女友雨僑日前拍MV被鐵架扑傷，他承認有看過女友的瘀傷：「好大撻。（心痛？）唔忍心見到柔弱嘅女仔受傷，都會唔開心。」接着更抵死說：「講啲爆嘢你聽。」身旁經理人即插嘴說：「你一陣就有撻（被打瘀）嘢嘞！」
文：音樂組