陳奕迅挑戰馬拉松跑7K行5K

事隔兩年再度推出廣東大碟的陳奕迅（Eason），昨日在尖沙咀舉行新碟《準備中》發布會。為隆重其事，大會更安排網上直播到內地、台灣、馬來西亞、日本和香港。現場又設網民提問，有香港的網民問Eason未來有甚麼事情想做，他表示受太太影響，或者嘗試跑馬拉松：「我仲係準備中，有跑過7K不過行咗5K。」又稱曾到日本替當時參加馬拉松比賽的太太打氣：「現場睇真係會感動，睇到佢哋嘅意志力真係好勁。」大會方面又特地準備生日蛋糕，替將在本月廿七日生日的Eason提早慶祝，並獲經理人甘菁菁送上藍芽喇叭作禮物。

走遍內地宣傳

問到是否真的打算跑馬拉松？Eason受訪時表示：「我有練，的確有咁嘅諗法，但我唔想講太多，又報埋名咁。跟住大家又係咁討論，我唔想咁。等我自己搞啦，我真係做嘅時候就會去做。」又稱接下來要走遍內地和台灣宣傳，然後下月回港替好友梁漢文任演唱會嘉賓，他說：「我想多啲時間做準備。」

陳奕迅在新碟發布會向獻花的小朋友獻吻。

經理人甘菁菁向陳奕迅送上禮物。

同家人過生日

然後他又重提早前金曲獎上技驚四座的演出：「我其實用咗兩個月時間準備，喺台上先可以咁自如，雖然都係有少少出錯。」談到有指羅志祥在當晚排於Eason後演出，因壓力大而致哭崩後台，Eason說：「唔關我事，可能佢自己諗多咗。」至於月底生日的他，到時可有慶祝活動？他說：「唔會特別慶祝，生日都係同屋企人過，靜靜地放鬆吓就好啦。」

文：音樂組