李璨琛踩入遊戲界 做大Boss
李璨琛（Sam）入行已近20年，除了拍電影、做DJ、成立個人品牌外，他早前更踏足遊戲界，在動作game中扮大佬壓軸登場！他又透露自己熱愛水上活動，更望年內考取船牌！而在演藝生涯中，Sam扮演過無數角色，令他留下深刻印象的亦不少，他更挑選《怒火街頭》中飾演的社工丁家富為其一大轉捩點。
藝人李璨琛（Sam）早前完成電影《港囧》拍攝，就到日本參與PS4遊戲《人中之龍0 誓約的場所》的製作，他受訪時說：「講個江湖人物由出道到做大佬嘅心路歷程，一句講晒成個江山就係打返嚟。我喺入面飾演中國殺手叫『老鬼』，喺最後一關出現，當玩家打敗到我佢就真係做大佬，所以我係個好重要嘅人物！」製作過程中，需要配音和進行3D電腦素描：「入面有對白，打鬥之前講啦，打嘅時候又有啲反應聲，仲要將成個人嘅輪廓scan入game，再做啲嬲、奸笑等表情畀佢哋做reference畫番入去。」
考船牌水上飄
《人中之龍》系列已推出十年，一直只有日文版，上月終推出中文版，導演在芸芸亞洲演員中選擇了他：「第一次做遊戲角色，似卡通片配音嘅感覺，對住動畫去配番對白，但最特別係動畫有我自己個樣，而且係配國語，我聽番都覺得幾新奇，因為自己好少喺螢幕上講國語對白，希望啲玩家見到會有驚喜。我都有問導演點解揀我，最主要係因為拍過《乒乓》呢套戲，而到依家呢個世代都仲好有代表性，令佢有深刻印象，再加上我喺香港拍過好多蠱惑仔戲，佢就決定搵我。」
除踩入遊戲界，Sam亦寄望年內能成功考取船牌，做個有姿態有實際的「水上人」：「自己鍾意玩水，買咗架水上電單車，希望可以一次過pass。」
爭氣做好角色
入行至今接近20年，Sam坦言參演無綫劇集《怒火街頭》是一大轉捩點：「我第一套動作片《特警新人類》個組合有霆鋒、馮德倫、吳彥祖、尹子維等，有好多動作場面我到依家都歷歷在目，學到好多嘢！之後拍咗好多鬼片、蠱惑仔戲，到2011年拍《怒火街頭》做丁家富，我竟然做社工，朋友聽到都笑我，我就更加要做好佢，真係好難得嘅機會，畀觀眾見到我另一種演技！」
場地：Boomshack
服裝：Derhill.com
文：陳丹
攝：劉智源