堅強與崩潰的23歲 鄧紫棋
前陣子，小記上載了一張與鄧紫棋（G.E.M.）的合照到Facebook，換來的是一面倒的「腐皮」（負評）。有人留言「因住近墨者黑」、「你上咗宇宙？」、「Shame on you」，從未見過這班朋友，如此槍口一致。奈何最諷刺的是，他們大多都未接觸過鄧紫棋本人，他們所認識的，是八卦雜誌上的「國際漿」。當你對鎂光燈下的人評頭品足時，有誰可曾在意過，是非中的主角遭千夫所指時的感受。隨口說得出來的負面新聞，幾乎都在G.E.M.身上出現過，本以為她已經百毒不侵，可是去年捲入小三風波、艷照疑雲後情緒突然爆煲，開騷前在化妝間裏崩潰爆喊，險令個唱撻Q。這個23歲的小妮子，原來不是想像中那麼堅強。
「我都係正常人嚟」
多咗人注意我，收穫多咗掌聲嘅同時，就會覺得多咗負面嘅流言蜚語。睇完呢啲新聞成日都會喊，我都係正常人嚟o架嘛，會傷心、會嬲，每次新聞出嚟我都會好歇斯底里，喊得最犀利我記得有次喺演唱會後台，我當時化緊妝，仲有兩個鐘就開騷，我喺度睇微博，突然睇到自己無端端變咗小三（被傳搭上有婦之夫張杰），我心入面已經有起伏，再碌吓碌吓，連嗰個裸照都話係我嚟。突然變咗小三又有裸照，令我個人好似好放蕩咁。跟住我話「咩事呀？明顯唔係我」，完全係亂嚟。
開騷前嬲到喊
仲記得當日我經理人（張丹）喺後台，我就有啲嬲嬲哋，因為我公司次次遇到呢啲新聞，反應都係「呢啲假嘅冇人理，唔好出聲」，成日叫我唔好出聲，嗰吓有少少嬲嬲哋，我就問佢「幾時同我出吓聲，唔該你同人講裸照嗰個唔係我」，佢就話「得啦得啦，我會同人講唔係你」。點知佢講完之後，諗住開個玩笑問我「咁究竟係咪你嚟？」嗰吓我就畀佢激一激，喺度喊，嚇死我個化妝師，因為我一喊個鼻就紅晒腫晒，個鼻大咗一倍咁。
想講你知……
成長其中一樣嘢就係要記得每個情緒，記得做緊嘅嘢嘅宗旨同目標。網民成日攻擊我，睇到會唔開心，之前寫過首歌叫《想講你知》，就係覺得網上啲人成日亂咁噏、講嘢好唔負責任，當然我以前都有啦，仲畀人搵過出嚟（在網誌批評胡杏兒）。有一排我更加係改圖嘅頭號對象，有啲人將我個金魚嘴擺咗入鉛筆刨，依家睇番呢啲嘢覺得幾好笑，一路經歷話畀我知，無論當下遇到咩挑戰同壓力，就算令到你好傷心、好嬲，過一排望番都係得啖笑。
明槍暗箭 見招拆招
年初開紅館演唱會，其中一場小鳳姐有嚟，我問佢以前點樣面對呢啲新聞？佢話一開始有單新聞令佢喊咗好耐，自此之後就開始儲低所有剪報，但佢就唔會即刻睇，會隔咗一年先會睇番。我覺得係個好好嘅方法，唔好將自己目光放喺嗰一刻嘅困難上面，一年後望番自己，發現只係一件好小嘅事，個心會堅強啲。同埋依家唔使儲剪報，網上全部有得Save低晒。
陳偉霆教「屎橋」拍拖
有傷害你的人，就會有替你療傷的人。在逆境中成長的G.E.M.，明槍暗箭中過不少，幸好有患難朋友、交心前輩為她沿途吶喊。
仲記得我第一次上封面，當時我得十七歲，嗰個封面話我去嗰陣男友屋企過夜，其實冇發生過嘅，我只係做完嘢去一去男友屋企，記得個記者衝埋嚟問我搵邊個，我就話搵朋友。當時覺得第一次畀人跟好緊張，去到我男友屋企即刻打畀陳偉霆求救，佢教我一個方法，就係下次擺定一件褸喺車，每次去親男友屋企就着嗰件褸，跟住下次畀人影到，就話人哋用舊相。最後我用咗佢呢招，點知有次新聞出嚟話我去男友屋企過夜，連續幾日衫都唔換，救命！依家我放棄用任何方法去掩飾啦。
家人朋友以愛換愛
最近呢一年多咗好多攻擊，我都快咗回復番，可能自己有信仰，教會朋友幫咗我好多。好似新歌《單行的軌道》講，人生就好似單行嘅軌道，冇得翻轉頭，好多時都有路牌，教你點行，畀好多規則畀你。但無論你有幾攰，時間唔會停低，世界一路都前進緊，正正就係呢個世界點樣都唔會停低，所以無論點，我都要向前衝，唔好畀任何牽絆令自己跌低。我依家只係想畀身邊嘅人更多愛，以前睇嘅範圍只係我嘅粉絲、觀眾，經過呢一年，係我人生最精彩同人生最脆弱嘅時候，身邊有好多愛畀到我，我屋企人、朋友，同佢哋關係親密咗好多，今年係我陪佢最多嘅一年，雖然我成日飛來飛去，但我一喺香港就會搵時間陪佢哋。
後記：預咗食死貓？
與其信別人的說話，何不相信自己的眼，耍大牌、氣燄凌人的「偽人」小記遇過不少，至少G.E.M.在鏡頭後會談笑風生，噓寒問暖。猶記得訪問當日，大家談起一單笑料，就是當日她出席杜莎夫人蠟像館開幕禮，事後在社交網站上載照片，「打卡」時卻錯寫成「杜麗莎夫人蠟像館」。
「其實嗰日我上載完張相，我哋公司有個新嚟嘅女仔打畀我，話我唔記得Tag番蠟像館。咁我就畀咗個Login Password佢幫我打卡，點知就搞成咁……哈哈哈。」G.E.M.說。雖然急急修正，但依然被網民Cap圖取笑。本來小事一椿，也可以被人無限上綱，大概入得呢行就要食得鹹魚抵得渴，有時候，很多事都不足為外人道，惟有默默「食死貓」罷了。
口述：鄧紫棋
筆錄：倪民清
攝影：嚴偉國