衞蘭又有脂音 陳康健：同佢熟！
衞蘭（Janice）自約滿舊公司後無王管，體重直線上升，由電單車變成坦克車！不過脹爆的她身邊不乏觀音兵，今期《好報》踢爆她被「巨聲幫」陳康健照顧得無微不至，男方更甘願做「傘兵」貼身服侍「娘娘」。原來Janice身邊還有另一觀音兵「ABC教友」，日前他被拍到陪Janice姊妹又玩又食。
歌手衞蘭（Janice）上年結束與舊老闆黎明長達近12年的賓主關係，雖曾被黎明笑「肥過部電單車」，但約滿後她身形再度發脹，進化成坦克車！不過身形無阻桃花，身邊不乏觀音兵，今期《好報》踢爆Janice有新「兵」，就是「巨聲幫」出身、外形粗獷的陳康健！
去到邊跟到邊
陳康健2009年參加歌唱節目《超級巨聲》奪第10名入行，雖然不為人熟悉，但成功攀附Janice成為好友，更甘願「當兵」獻殷勤。日前二人被發現到淺水灣見證教友受浸儀式，陳康健全程「人盯人」，只要Janice走到哪，都會見他緊貼身旁，甚至Janice去洗手間，陳康健也緊守門口等伊人，又時刻為她撐傘，難怪「娘娘」Janice被氹得甜甜笑，忍不住打情罵俏，甚至輕拍對方一雙肥臂。期間有男教友邀Janice自拍，眼見兩人表現得較親暱，一直近距離監察的陳康健，即緊張上前傍住Janice，之後大伙兒到餐廳食飯，他又貼身追隨「娘娘」。
昨日Janice及陳康健分別接受電話訪問，有默契地謂對方是教會朋友，Janice說：「真係似咩？（好Sweet喎！）唔係啦，純粹係教會啲朋友。」問她未來的工作動向，她說：「工作方面未有安排。（積極啲啦！）係啦，好快會見到我。」之後她以與朋友聊天為由收線，但據知她將轉投華納，頂替結婚及懷孕後有意退出的官恩娜做「一姐」。
至於陳康健則說：「我同佢好熟o架，喺教會度識。」對於外界指他「當兵」，他毫不介意並再三強調：「算吧啦……算吧啦……唔理人哋點講！」他否認對Janice有追求之意，他說：「梗係唔係想追佢。」
ABC教友陪食
除了陳康健外，Janice原來還有另一名ABC教友「當兵」，當日受浸後她載陳康健及ABC教友離開，到大圍放下ABC教友時二人在車廂內Goodbye kiss了一下，翌日更發現他早在Janice家中，陪同Janice及衞詩行街，甚至陪她們食中菜！
文：音樂組