Coffee踎出慾火 王宗堯讚柔韌
女星林芊妤（Coffee）、王宗堯、張建聲及徐錦江等昨日到旺角「鬥踎」，以宣傳新片《壹獄壹世界》，Coffee透露與王宗堯在戲中有連場情慾戲，連自己都怕醜得要掩面睇，她更指前度男友睇到要向她投訴，不過王宗堯就讚Coffee專業兼柔韌性強。
林芊妤、王宗堯、張建聲、馬嘉韻及徐錦江等昨日到旺角宣傳新片《壹獄壹世界》，大會招募數十市民在現場進行「鬥踎」比賽，Coffee按大會指示，用毛毛棒撩男參賽者，有人更興奮大嗌。王宗堯在大合照時用道具手扣將Coffee鎖在道具監獄的鐵枝上，令Coffee面露尷尬。Coffee等埋位時與張建聲雞啄唔斷，見對方身水身汗，即為他抹汗，非常體貼。
遮面睇試映
Coffee提到與王宗堯在戲中的情慾戲時說：「除咗一場戲外，我場場都係同王宗堯嘅情慾戲，（性感上陣？）低胸衫、短裙我OK，但意識好大膽，我睇試映都要遮面，怕屋企人睇到戲，我會尷尬。爹哋之前問我係咪拍咗套戲同內容，我停咗三秒唔識答。前男友仲問我做乜拍三級戲？（佢想翻撻？）冇理佢，佢又唔係我男友，前度啫，關佢咩事？（殘廁嗰個？）唔係，係再之前嘅男友。」
王宗堯談到與Coffee的火辣演出，他說：「冇尷尬，大家都專業，你知Coffee幾勁啦，我指佢嘅磁場，佢又玩瑜伽，柔韌性好強。（Coffee畀前度投訴。）邊個？殘廁嗰個？點解投訴？係錫佢就唔好飛人，本來可以疊埋心水嫁人，未必要做演員。依家Coffee自食其力，一個女仔支撐成家人，聽講話買樓添，佢條路行得幾好，祝福佢。」
張建聲割瘤
張建聲則透露驗出脂肪瘤：「我阿爸患過癌，我都有啲擔心。過幾日會拍廣告要騷肌肉，怕人誤會我粒脂肪瘤係腹肌，考慮遲啲做微創手術，整走呢粒『龍珠』。」
文：影視組