吳若希怨緋聞趕走桃花運

緋聞女王吳若希(Jinny)最近盛傳不忿花心漢周志文背住她四圍「溝女」,做金手指向無綫打毒針,令周志文不獲續約。Jinny昨日出席戶外直播,她懶理傳聞說:「如果得閒我都煮飯畀媽咪啦!我唔做損人不利己嘅嘢。」不過她自爆曾致電及傳短訊給對方,但對方未有回覆,莫非周志文信以為真?Jinny說:「如果咁都冇辦法。」對另一緋聞男友溫家偉踢爆她與周志文互有好感,她笑說:「我有鬧佢做乜亂講,佢都話自己未瞓醒,大家知道佢鬼仔o架。」

恨生仔怕呷醋

戶外直播在有關BB用品展覽內進行,Jinny坦承想做媽咪,她笑說:「想生仔先,仔黐媽咪,不過將來老公唔可以一返屋企就睇小朋友,我會呷醋。」恨嫁的她希望30歲前結婚,但大呻緋聞令桃花減少,她說:「好多好嘅人都會抗拒,搞到半天吊。」

家燕姐想抱孫

同場還有藝人趙頌茹(Yu)、薛家燕,阿Yu被問分居丈夫周永恒暗示有人不讓他見兩個女,阿Yu表示一切會以小朋友福祉為大前提:「我唔明佢想講咩,我唔再回應佢嘅嘢,(個女有冇提爸爸?)唔再講。」

薛家燕有兩女一子,坦言想抱孫,但她說:「好想!但佢冇拍拖。」並再三否認大女石祐珊跟王梓軒拍拖:「搞到啲人都唔敢追佢。」家燕姐直指女兒性格像她,感情事順其自然,不會給予壓力。

文:音樂組