G.E.M.決意洗底修補關係
過去一年，鄧紫棋（G.E.M.）贏得最多的掌聲，同時也聽盡無數人的喝倒采聲，「囂張大牌」幾乎成為了她的標誌，年初更與香港傳媒關係勢成水火，檢討過後，G.E.M.受訪時決意洗底大平反，望以真誠修補雙方關係重新出發！
娛圈向來是個樹大招風之地，而打在G.E.M.身上的風，從未停過。就在這個風雨不定的五月，她所屬公司主動邀請本報獨家專訪這位在是非中成長的風頭躉。「其實我以前都多是非，但係去到今年，覺得破咗新高。同時呢一年，係我人生最精彩同人生最脆弱嘅時候。」G.E.M.說。
起初以為收錢抹黑
可是空穴來風未必無因，自從參加《我是歌手2》後，G.E.M.人氣連帶是非接踵而來，每途經中港台三地，總鬧出囂張、耍大牌的負面新聞。年初回到香港舉行的巡唱，本應算是衣錦還鄉，但最終成為最多是非的一站，事關其公司請香港文字傳媒吃閉門羹，加上經理人張丹炮轟傳媒，令雙方關係近乎擘面。
別人眼中囂到上太空的「宇宙天后」，G.E.M.終作出大平反：「我覺得自己一啲都唔囂張同大牌，一開始畀人攻擊，覺得係人哋收咗錢抹黑我，諗諗吓唔係喎，真係多得滯，會唔會大家真係咁覺得呢？啱啱入行時好細個，好多嘢都係公司幫我處理，我只係負責聽話。我依家會開始投入多啲，可能會關心吓公司點同傳媒接洽、安排係點，一個團體，我開始有我自己嘅意見，好多時溝通上要更加仔細。」提到不少矛頭指向張丹麻煩？她說：「如果我話佢麻煩，佢會傷心。我成長同時，背後嘅工作人員都會成長，一定唔可以喺跌倒過程互相指摘，因為一個團體應該一齊去檢討，唔應將所有責任賴落人哋度。」
要用真誠打動大家
有傷口自然便要找愈合的方法，要修補與港媒的關係，G.E.M.希望展示真誠一面來打動大家：「關係呢樣嘢最重要都係真誠，當人哋直接接觸到你，你係真誠定係講官方說話嚟氹人，呢啲係會直接感覺到。唔理咩原因都好，好多時都有人阻隔咗我同其他人嘅關係，我會將呢啲嘢攞走，直接將自己展示喺人前。」逆風而行的路走多了，終究也有疲憊的時候，看來G.E.M.開始嚮往風平浪靜的生活。
服裝：Tatty Devine、Alice McCall、Aldo
文：倪民清
攝：嚴偉國