方中信讚曾江戲場恐怖 忐忑爭男配

方中信憑電影《竊聽風雲3》提名今屆電影金像獎「最佳男配角」，飾演土豪的他，以一頭趣致假髮兼獨特圍村話，成功令觀眾留下深刻印象，原來劇組當初於其角色構造上，給予方中信很大的自由度，讓他自選假髮及電髮外，說話語調亦可自由調校，及後更找來一名圍村後生仔作指導，令他於沒包袱下演出。

入圍五強希望開齋

談到同片的曾江也有份角逐男配角，方中信大讚對方演技頂呱呱：「一行出嚟唔使做戲都壓到台，氣場好恐怖，好有感覺，啲戲好出，我甘拜下風，點鬥？由佢做粵語長片睇到依家，你話有幾勁啦！」他坦言尚未完全欣賞王寶強、林雪及吳孟達等其餘對手的提名作品，但對自己有份入圍五強已感高興。

老戲骨曾江在片中獲讚氣場超勁。

劉青雲力撐同片的曾江及方中信。

方中信曾於華語電影傳媒大獎奪得影帝，他笑言今次降grade提名男配角沒所謂，皆因已先後獲提名四次：「係冇拎過獎，但屋企多個提名狀掛喺度都滿足，都希望喺香港可以拎番次嘅。（信心？）冇話大唔大，睇番部戲都幾鍾意，滿意囉！」對於影帝、后心水，方中信表示睇好劉青雲及湯唯。

欲買跑車自我獎勵

已五十有幾的他，坦言今時今日已不會刻意追求獎項，反認為追求「奶粉錢」更為重要。他笑言早年為了女兒放棄買跑車的興趣，如今囡囡日漸長大，他笑言終可「重出江湖」：「呢幾年做嘢好辛苦，唔想虧待自己，咩都益晒個女，係時候買嘢獎勵自己。（再生？）50幾歲再生？痔瘡都生唔切啦！」

文：影視組

攝影：黎志輝