杜汶澤靈感到先賀阿Sa捧獎
藝人杜汶澤（阿澤）昨日出席活動分享旅遊心得，阿澤表示早前與太太田蕊妮到東京旅行，因日圓下跌令他覺得「慳唔少」，而且太太一季才購物一次，故到日本旅行實行讓太太豪買！他說：「機票有積分換，可以用啲機票錢去買嘢，依家匯率係六算，食餐飯都覺得抵食好多。（使咗幾多錢？）六位數字啦！」
談及由他監製的電影《雛妓》，女主角蔡卓妍（阿Sa）提名最佳女主角，阿澤直言對阿Sa奪獎信心大：「愈近（金像獎頒獎禮）個靈感就更加強，恭喜定佢啦！（今年對手好強噃？）對手強好過對手弱，當年我入圍都輸畀青雲哥哥（劉青雲），輸畀個咁強嘅對手，返屋企都唔會畀人鬧呀嘛！如果佢贏到就唔係好彩！大家都想佢拎，都肉赤佢拍得咁辛苦。」
