陳展鵬潛行木人巷
重返無綫踏入第七年的陳展鵬，在事業經歷過低潮期，但憑住自強不息的心態和打不死的精神，逐漸受人注視，搖身一變成為一線當家小生之餘，更於「星和無綫電視大獎2014」中榮登新加坡視帝，但他沒有因而自滿，不但直言自己未在「木人巷」中修煉完畢，更視無綫劇《天眼》中的孖生大佬鄭嘉穎為指路燈。而就算面對一系列傳聞，自認包袱少的他亦一於少理，因為最在乎的始終是工作，以及未必喜歡他的那個她。
１：拒脫「穎」而出
在《天眼》中與鄭嘉穎亦敵亦友的展鵬，在現實中卻與對方惺惺相惜，不但視對方為兄長，更認為他是事業上的效法對象。
已經唔係朋友咁簡單，係大家個方向、價值觀都係好一致，好似拍《天眼》好多火花同劇本裏面都投放咗大家嘅諗法。最夾嘅係大家都係比較慢熱，同人哋好似隔咗層嘢，同佢好少多餘嘅說話，都係希望識個交心朋友。其實我啱啱返嚟無綫就已經同佢合作，佢真係可以話喺公司睇住我成長，所以佢都話今次合作，同佢好似佢係哥哥咁。
其實我又冇諗過會唔會學佢咁北上搵銀，唔係話你想搵就可以搵，要睇吓自己個價值同個角色係點。嘉穎真係一個先頭部隊嚟，就算佢北上完都會返香港繼續工作，件事好良性，畀到我哋一個啟示，話畀我哋知唔係有錢搵就得，就咁上去只會毀咗後面嘅路，返唔到轉頭。
２：真愛門常開
自：從與前亞姐冠軍姚嘉雯2010年時分手後，展鵬一直事業為重以單身寡佬自居，但大門常開的他就自認會一見鍾情，更直言有對象。
對象就一定有，但係我鍾意人，人哋未必鍾意我o架嘛！我成日都講我哋做呢行係比較自私，工作性質好自私，搞到自己都變得自私。我又比較鍾意舊嗰套，希望觀眾可以留意我工作方面多啲，但就算撞到我都唔驚，到時咪認囉。不過我始終覺得公開咗我私人生活，會搞到另一半，你又唔知佢接受能力去到邊，可能會因為件事而驚咗我。我諗之前分手係我唔拍拖住嘅原因之一，當時覺得未有能力可以處理到呢啲嘢，更何況工作可以填滿咗我，所以就繼續喺工作裏面尋求。我道門一直都打開嘅，冇閂過，我諗我自己條命都係一見鍾情，好難話做到朋友一段時間之後先至會拍到拖，所以好大危機，太講Feel。
３：赤裸的誘惑
談到有網民對展鵬全裸浸溫泉念念不忘，他就相當興奮，揚言有機會會再騷Body！講起與李思棋的另類情侶檔更樂此不疲！
依家有機會再影，會更加鍾意我，因為依家嘅身材好過以前好多，Keep得弗過以前。即係咁，嗰次唔係自己特登露，咁溫泉就梗係唔着衫褲o架啦，要寫實o架嘛，冇理由包條巾咁奇怪，錯晒！有機會拍戲露股，劇情需要嘅，咪露囉！但露埋前面就好難喇，唔係我抗拒喎，係我未有功力，露呢啲要有功力o架，要神級！咁之前網民惡搞我同思棋姐我都覺得好開心，個反應咁樣即係代表成功咗，仲幫咗我好多添！好多套劇都係做我媽咪，情侶檔都有好多種，但唔好講得咁核突！
４：修身搲贊助
人紅自然多是非，展鵬不只曾經傳多次緋聞，更傳出整容換新Look，但他統統一笑置之，笑言自己化傳聞做搵錢良策，認真樂觀！
其實影唔到咩嘢出嚟，淨係傳啫，不過我都開心嘅，傳親嘅女仔都係女神級喎！但唔好再傳喇，搞到我好似好花心咁，手仔都未拖過，唔好話蝕唔蝕，淨係對象問番我都唔知點答；但傳我整容我又OK喎，嗰幾個月真係賺咗好多錢，唔係因為我靚仔咗，但唔知點解有三間美容公司搵我剪綵，我何樂而不為！同曾江嗰把頭髮有異曲同工之妙，所以你話我甩晒頭髮我都冇咩所謂，話我前面光光哋，咁就有筆賺喇！不過諗起都好笑，畀人話完整容兩個月後就打回原形，但如果真係有人Sponsor，我都要睇吓整咩，有啲微調真係會令人靚好多嘅，但對眼冇咁大整到咁大就接受唔到囉。自己最唔滿意都係身形，努力緊o架喇，男仔個樣唔係好重要o架啫，乾淨同健康先係最緊要。依家先整容就唔好啦，搞完仲大鑊，都已經睇慣咗你個樣啦！
５：等機會發圍
雖然展鵬事業正穩步上揚，但他卻沒有因此而自滿，更直言自己在「木人巷」未修煉成功，除天時、地利外，尚欠一份努力。
其實唔係淨係話等緊一個角色，我係等緊一個天時地利，每一個獎項其實要好多嘢去配合，但係就算係有天時，你都要付出努力去配合。喺呢行做得耐，你可以睇得化，但係唔可以冇咗道火。可能人哋努力付出得比我多，而我又真係冇咩包袱，同埋好多人都話無綫係一個木人巷，有好多人未練成就跳咗出嚟，點解以前啲人做到巨星，因為佢哋打晒成條巷，我依家都仲未完成成個課程o架，好似我冇乜做過喜劇，但係我份人係可以豁出去！
後記：佬味濃
陳展鵬無論戲裏戲外都給予人一種認真、成熟的感覺，但是卻如他所言一樣慢熱，訪問途中更變成開籠雀愈講愈多，男神級的魅力隨時間漸濃，一如一口香醇紅茶，愈嗒愈有味！
口述：陳展鵬
筆錄：若瑟
攝影：唐豁莊