阿Sa為拍好戲 收一折片酬

蔡卓妍憑電影《雛妓》角逐今屆金像獎影后，她在片中的演出令人眼前一亮，奪影后的呼聲甚高。而前日阿Sa率先奪得大阪亞洲電影節頒發的「特別表揚獎」，獎項是專業評審選出的三個大獎之一，殊榮等同影后。據知電影開拍前，投資方將今次製作費定額於一千萬港元以內，而阿Sa睇完劇本後甚為喜歡，願意將原本收取的每部約400餘萬人民幣（約500萬港元）片酬「大割引」，破例只收十分之一，即約50萬港元。

主力Twins合體

阿Sa今次接演「另類電影」獲得空前成功，至於日後接拍的電影路線，她希望以多元化為主，阿Sa透過經理人霍汶希表示：「阿Sa都想拍多啲唔同類型嘅電影，不過今年係Twins成立嘅15周年，所以主力都係想做番相關工作，希望『工餘』都可以撥到時間參與多啲電影拍攝工作。」

與阿Sa分屬好友的樂壇天后容祖兒，昨午出席化妝品品牌植村秀的發布會時直言戥阿Sa開心，她說：「我睇報紙見到，老闆（楊受成）有告訴我，我係『星星傳聲筒』，跟住我又話畀身邊的人知。我都有祝佢今年玩晒，佢又同咗T.O.P影相，之後又攞獎，今年仲唔係佢嘅年！」

祖兒想拍驚慄戲

問祖兒會否也想嘗試類似角色？她表示有好劇本和對手都會嘗試：「之前華哥（任達華）喺after party同我講：『下一個到你啦。』其實唔一定係雛妓角色，可以係第二種類型，可以係恐怖、驚慄。」

另外，祖兒為該化妝品品牌拍攝了七個造型，當中一個要被粉底液淋頭，她對此表示過程辛苦：「第一次畀粉底液淋，因為覺得靚，所以想試吓，但之後返屋企沖涼都要洗咗幾次先得，師兄（劉浩龍）冇話心痛。」

文：名人組