祖兒銷量大贏家勁擸5獎
樂壇天后容祖兒今年初在頒獎禮上成績驕人，前晚在以唱片銷量為計算單位的IFPI頒獎禮再下一城，以大贏家的姿態勇奪五獎，難怪祖兒直言今次獎項令她很有感覺：「好直接反映受唔受歡迎！」
《IFPI香港唱片銷量大獎2014》前晚假將軍澳電視城舉行，天后容祖兒一口氣拿下「全年最高銷量本地女歌手」、「全年最高銷量本地現場錄製音像出品」等共五個大獎，成全晚大贏家的祖兒直言奪得銷量獎有很大感覺：「每個頒獎禮有佢哋唔同準則，但銷量係歌迷真金白銀買，同你開演唱會歌迷畀錢買飛一樣，好直接反映受唔受歡迎！」
祖兒表示今年計劃推出兩張唱片，稍後亦與李克勤合作演唱會，更有意找王菀之作曲：「我好鍾意佢嘅旋律，佢同張敬軒首《手望》我好鍾意，我問咗佢，佢話睇吓有冇靈感。」
郭富城經歷多恨唱情歌
憑演唱會原聲大碟榮奪「全年最高銷量本地男歌手」的郭富城坦言，已多年未有踏足電視城和接受音樂獎項，雖然他忙於內地拍電影，仍特地向劇組請假回港領獎。城城說：「套戲拍到今個月底就拍完，真係好辛苦！我每日要用四至七個鐘頭化妝，黐到成身毛連食嘢都唔得，拍一日戲就好似做咗兩、三場演唱會咁攰，所以今次返嚟唱歌我覺得好輕鬆。」
問到今次獲獎後會否想再出新唱片？城城謂：「我依家好隨心，有時間同有好歌當然想出，我都想唱吓情歌，覺得人生經歷多咗，唱出嚟特別夭心夭肺，我好似好乜嘢咁，但表達出嚟會好唔同。」
謝偉倫邀台音樂人幫拖
同樣事隔多年再參與的張敬軒亦勇奪三個獎項，他稱今年要努力工作，希望在港置業。去年出唱片的鄭俊弘和謝偉倫齊奪得「最暢銷本地男新人」，謝偉倫稱正製作國語碟，並會找台灣的音樂界朋友幫忙。獲獎女新人方面就有田蕊妮、柳妍熙和兼任司儀的何雁詩。
文：音樂組