夏尉喻Big退雞排妹
「寸嘴Barbie」夏尉喻及「台灣雞排妹」鄭家純前晚同場鬥晒豐滿身材，雞排妹以低胸Tube Dress晒事業線，但仍不敵Barbie的巨型「青筋籃球胸」！她們分別與戲中對手關楚耀及陸永合照，兩位男士面對爆乳尤物，均不敢直視！
藝人關楚耀（Kelvin）、陸永、「寸嘴Barbie」夏尉喻、石天欣、金剛、「台灣雞排妹」鄭家純、許維恩及「小甜甜」張可盷前晚出席錢國偉執導電影《台北夜蒲團團轉》的造勢音樂會，Barbie以超低胸裙騷勁爆「籃球胸」，合照時令Kelvin硬晒軚，雞排妹身穿性感Tube Dress，明艷照人，雖未及Barbie震撼，但已令身旁的陸永唔敢亂望！
陸永摸女 向老婆贖罪
而Barbie於戲中與Kelvin演一對，問到可有激情戲？她搞笑說：「我有毆打佢、熱吻佢、玩弄佢，幾激烈！（親熱戲？）好多身體接觸！身體有八、九成地方掂到。（蝕底？）大家都有大家嘅快樂啦！我係一個靚女，佢又係俊男嚟嘅！」Kelvin解釋親熱場面是背着Barbie行了一段路，他笑言最近有健身，能以背肌頂實對方身材。陸永則要撫摸穿泳裝的雞排妹，被對方踢爆他緊張得雙耳通紅、發抖及狂標汗，陸永笑言拍攝前已向太太備案，但不會叫她入場，是否怕扭耳仔？他說：「咁簡單？不過有片酬我會識做，唔使下下罰自己，可以用獎勵人嘅方法贖罪！」
Barbie又透露騷上會跟陸永鬥Rap：「我有請教佢，希望做到女Rapper！」陸永亦笑說：「Barbie得o架！繼續啦！佢點擊勁過晒啲正常音樂人！」
另外，金剛透露早前返內地拍劇拍足四個月，不怕跟女友蕊蕊聚少離多會情變，早前已帶女友到台灣拜年見家長及慶祝情人節。
文：影視組