孫耀威童顏戒女等紋到

自爆曾偷食

Eric雖然名草有主，不過在這個花花世界，即使名草有主照樣有蝴蝶自動獻身，但Eric懂得控制自己，以免跌入無底深潭。

有少數飛來蜢啦，都要有嘅，如果唔係我唔掂o架喇。我唔知佢（陳美詩）有冇，希望佢有啦，如果唔係即係代表我眼光差。我台灣有餐廳，上海有club，其實club入面一定好多好靚嘅女仔，所以誘惑一定係好多，所以要好清楚自己做緊乜嘢，唔好畀自己有出軌嘅思想，係難o架，但我一諗到後果就會收起念頭，諗到一連串嘅嘢，例如我會唔會被偷拍呢？會唔會分手呢？被人唱衰呢？其實三思而後行減少好多人生遺憾。

精神上出軌

其實男仔見到靚女一定心動，但我會諗你有女友o架喎，如果人哋咁對你，你會點？你會唔會忍受到因為咁而失去你女友？偷食一定有，以前冇諗得咁通嗰時，唔好講話真正出軌，精神上出軌一定有，會幻想同呢個女仔一齊會點。但依家見到靚女會掉頭走，驚咗，即係唔好再畀我喺呢啲誘惑裏面，因為控制唔到，快啲閃好過。

孫耀威事業有成，但他仍想更上一層樓。	與陳美詩感情穩定的孫耀威也想定下婚期。（資料圖片）	在《叛侶》的MV中，孫耀威要肉搏火辣台妹。

事業再衝刺

自小讀書成績好的Eric，現時歌、視兩邊皆吃香、生意版圖愈搞愈大、有個通情達理的另一半，在一般人眼中，與「人生贏家」似乎已畫上等號，但他仍謙虛否認。

仲未係「人生贏家」，我慶幸自己喺呢個圈20年，雖然唔係一個咩大成就，但有一席位已經夠。生意方面，反而覺得開咗咁多個頭，就要醒醒定定，唔係衰咗就瘀皮。

想擁有家庭

其實依家真係好忙，日日都有新嘅事發生，例如要參與唱片封套設計，又要自己剪接MV，之前仲要作曲填詞，我又有自己生意，所以不停香港、上海、台灣三邊飛，睇番飛行里數紀錄，九個月入面飛咗120幾次！上年係我人生最忙嘅時期，我都想定婚期，但暫時生意、演藝仲有好多嘢想做，我諗唔到有咩嘢係可以放低。不過，結婚生仔我係一定會做，我好鍾意小朋友，好想有自己家庭，我覺得我都仲有時間，偷少少時間去做啲自己事業上想做嘅嘢先，當等唔到嘅時候我就會去進行呢一切。

在台灣仍人氣高企的孫耀威早前與楊謹華拍台劇《女王的誕生》。	孫耀威（中）對音樂不離不棄，去年在新城國語力頒獎禮獲兩獎。	孫耀威曾在自己的夜店慶祝生日。

遺傳靚皮膚

雖然Eric不時做空中飛人，休息時間不夠之餘，又食無定時，不過仍保持皮光肉滑，絕對叫一眾女生咬牙切齒！

其實都殘o架，但我baby face，好彩遺傳到媽咪嘅皮膚，20幾歲就似10幾歲，30歲就似20歲，減咗10年，可以呃得吓人。其實我好想有幾條皺紋，尤其是當我做戲時，就發覺baby face係我包袱，你睇吓我仲拍到偶像劇，然後同劇20幾歲嗰個演員話「大佬呀，你睇落仲後生過我！」我惟有話「sorry囉，唔係我嘅錯。」

羨慕梁朝偉

不過，當我睇到梁朝偉拍戲嗰啲眉頭緊皺嘅場面，就知太baby face對做戲有影響，最好打針可以打啲紋，整幾條喺度，男人有皺紋係sexy啲。

文：賈呂臣

攝：嚴偉國