子丹宇宙最忙 呻唔得閒生Ｂ
甄子丹昨日被《好報》報道一家四口與詩詩妹妹汪圓圓、妹夫蔡加讚等到馬爾代夫度歲。「宇宙最強」子丹大讚圓圓囡囡Celine可愛，每次見到Celine都會想起仔女小時候的樣子。問會否想追多個？他笑言順其自然，不過就呻與太太工作忙碌，冇時間造人。
昨日《好報》披露「宇宙最強」甄子丹、老婆汪詩詩、囡囡甄濟如、囝囝甄濟嘉、詩詩妹妹汪圓圓、妹夫蔡加讚等廿多人到馬爾代夫玩足5日4夜度歲。子丹受訪時透露今次旅程既開心又辛苦：「仲辛苦過開工，不過陪小朋友冇所謂啦。（以後多啲請假陪家人？）盡量抽時間，逢新年、太太生日、結婚紀念日都會攞假，暑假就要睇有冇空檔。」子丹透露下月會到上海拍攝《葉問3》，老婆已計劃與仔女一齊去探班。
憶仔女兒時模樣
提到圓圓首次帶囡囡Celine同行，子丹大讚Celine可愛，詩詩亦心郁郁話想追多個。作為「愛妻號」的子丹當然配合老婆：「依家我兩個小朋友都大個，睇到圓圓個女都好懷念佢哋細個嘅時候。（追番個？）順其自然啦，冇所謂，有就開心，不過我同太太喺工作上都好忙。」大忙人子丹早前與老婆一齊擔任SINOMAX產品代言，夫妻檔拍廣告，子丹更為藝術犧牲，化身超級肥仔。
善心爆棚探貧童
另外，一向充滿善心的子丹與詩詩出發到泰國與緬甸邊界，探訪當地貧窮兒童。昨日兩人已抵達當地機場，由於仔女都要返學，故未有同行。子丹說：「上年都有帶佢哋去深水埗探訪老人，畀佢哋體驗吓，知道自己嘅生活幸福，學識知足同有愛心。」
文：名人組