華哥怒摑阿Sa開戲補鑊
任達華怒摑蔡卓妍（阿Sa），事後五指痕清晰留在對方粉臉上，令華哥大感肉痛！他直言平生第一次打女人，內疚可想而知，他更承諾稍後開戲讓阿Sa與男友陳偉霆（William）情侶檔出演「補數」。
雖然《雛妓》未正式上映，但阿Sa於戲內豁出去的表現，為她換來金像獎及福岡影展影后「入場券」，拍檔華哥更對她非常有信心。電影公司昨日發布華哥怒摑阿Sa的相關劇照，劇情交代華哥對阿Sa漸生情愫，但得悉對方有追求者，醋意大發因愛成恨，將阿Sa當成人肉沙包般來掌摑出氣。
一巴掌換準影后
談到這場戲，華哥直言大感無奈：「阿Sa瘦到好似張紙咁薄，而我咁大個人都未試過打女人，惟有同佢講，我打你兩巴會造就你成為『最佳女主角』，好彩都不負眾望入到圍。事前我叫劇組準備桶冰畀佢用嚟敷面，但佢皮膚太白，一打完佢就成塊面紅晒，手指印好清楚。（琦琦有冇試過好似劇情咁，令你理智盡失？）冇喎，我係雙魚座嘅，集合理智同浪漫於一身！」華哥又指導演邱禮濤後來加插了一場阿Sa掌摑他的戲「補數」：「女人唔識借力，嗰巴真係食得應，大家打平手囉。」
「閉關」投入情緒
華哥年前首執導筒，口碑票房不錯，原來他正計劃年底「重操故業」，開拍一部題材涉及靈異及警察的故事：「所有嘢都好初步，不過依家講吓講吓，覺得不如搵阿Sa同William一齊演啦，我好錫佢兩個嘅。」而阿Sa則透露為投入角色情緒，拍攝當天自己「閉關」，並要求曾出現在片場的監製杜汶澤離場：「佢喺度我會好大壓力呀！」
文：影視組