古天樂6億鑽石盤進軍飲食業

賺錢有道的古天樂身家不停以倍數翻漲，44歲之齡、成熟靚仔、有錢同時更是出名孝順仔，一早被捧為圈中超級筍盤之選。古仔拍戲收入穩定，每部電影片酬過千萬，有了如此強勁「後盾」，難怪近年他開始心思思向自己的興趣着手，一方面投資拍電影，一方面繼續以其準繩眼光投資房地產業。識飲識食的他最近更大手入股飲食業，去年底成功收購位於銅鑼灣摩頓台的中式食肆名廚，古仔有見自己經常忙於拍戲四圍飛，為免兼顧不了生意，購下餐廳後繼續由原班人馬打理，其拍檔包括飲食界出名的Ling姐，擁有不少政界及商界捧場客。

先到吳志雄家拜年

古仔自從成為餐廳幕後老闆後，每逢有時間在港均會廣邀好友「試菜」，而且每逢有貴賓光臨，他都會親自落場招呼，一方面和好友敍舊，一方面又可以搜集各方意見，努力改良各樣菜式。圈中好友吳君如與老公陳可辛一家、黃秋生、佘詩曼、蔡一智夫婦等都曾經幫襯，人人食完均大讚好味，口碑一傳十，十傳百，令到餐廳火速成為圈中人的聚腳地，生意不斷上升。

謝天華與吳志雄等品嘗完美食後，非常滿足地離開餐廳。	吳志雄在微博上載美食「清蒸切件金老虎」。	古天樂（右起）、吳志雄、謝天華等邊飲酒邊傾偈。

前晚新春期間，古仔相約謝天華到資深電影人、有「大佬B」之稱的吳志雄家中拜年，晚上一行人再約埋唐詩詠，拉大隊往其餐廳品嘗拿手的清蒸切件金老虎、杏汁豬肺湯、無花果拔絲咕嚕肉、胡椒蝦和炸子雞等美食，各人食到晚上九時許步出。志雄哥拖實太太，飲到面紅紅的天華撇甩坐月的太太和兒子赴會，他熱情地抱拳向大家說：「恭喜發財！」然後登車做乘客離開。

古天樂位於銅鑼灣的餐廳環境優雅。	吳君如與陳可辛經常帶女兒到古天樂的餐廳食飯。	去年七月，阿佘到古仔餐廳出席飯局，腳步浮浮的她需由梁家樹及Ling姐攙扶離開。

親自送客盡心盡力

現場所見，古仔和Ling姐親自送各人上車，服侍周到。之後他折返餐廳打理事務，最後才孭着背囊離開，相當盡心盡力。古仔和謝天華誠意十足地拜年，志雄哥不忘於微博大晒靚相。兩位型仔和志雄哥大玩Selfie，幾個大男人Chok到爆地拍照。

文、攝：追蹤組