靚靚名店掃貨 張智霖卡任碌
張智霖（Chilam）與袁詠儀（靚靚）結婚14周年紀念，婚前婚後恩愛不減。前晚兩人相約一眾好友歡聚共度，窩心的Chilam更一早約太太行街，任靚靚在名店「任揀、任碌」禮物，同時更承諾結婚廿周年必定舉辦盛大派對，答謝太太多年來的風雨同路。
圈中恩愛夫婦Chilam和靚靚，於1992年拍攝電影《邊城浪子》撻着，2001年秘密於外國註冊結婚。前日正值兩人結婚14周年，愛熱鬧的張生張太撇甩8歲愛子張慕童，選擇和朋友共度。當晚兩人相約沈嘉偉、邱淑貞夫婦、蔡一智、周雪芳夫婦等於跑馬地歎法國菜，眾人邊飲邊傾，度過愉快的一晚。
靚靚：好開心
至凌晨12時各人始盡興離場，見情緒high爆的Chilam拿着一支靚酒，和靚靚一一擁抱告別各好友。穿白色大褸的邱淑貞亦面露燦爛笑容，心情大好地不停向大家揮手。Chilam和靚靚隨即登上停泊在餐廳外的法拉利跑車，臨上車前被問送甚麼禮物給太太？兩人異口同聲地說：「好多呀！」靚靚更補充說：「好開心呀！」事實上，Chilam沒有說謊，近年事業大豐收的他，為賀結婚周年一點也不吝嗇，日前他抽空陪太太行街，目的是讓靚靚自行話事，一於想買甚麼便買甚麼，自己則負責碌卡和簽名。
多謝豆斗復出
Chilam昨日接受電話訪問時說：「其實都係前一晚大家傾傾吓約咗出嚟，順便想多謝豆斗（邱淑貞）為咗我哋兩公婆東山復出做節目嘉賓。」至於太太和他相知相惜14載，他感性地說：「我好多謝佢畀咗個咁天真活潑嘅小朋友畀我，有咗家庭令我做嘢冇後顧之憂。（會搞大型派對慶祝？）想等結婚廿周年先，我哋漫漫長路，有排行，唔使急！」
文、攝：追蹤組