Tiffany公主出巡嘉玲派吻抗韓
韓國人氣女團少女時代成員Tiffany與型男崔始源前天分別飛抵香港，並於昨日一同出席時裝活動，獲近千名粉絲守候及途人圍觀，而兩人極之親民，除Tiffany主動跟粉絲揮手打招呼外，崔始源還識做地跟粉絲握手和自拍，氹得粉絲尖叫聲不絕！不過本地薑影星劉嘉玲亦大派飛吻冧粉絲。
少時成員Tiffany、韓星崔始源、影視紅星劉嘉玲及藝人黃宗澤等，昨日齊齊出席時裝品牌Valentino開幕酒會，現場星光熠熠！一身see through大露背上陣的Tiffany性感非常及表現極之親民，全程笑容滿面地跟粉絲揮手打招呼，又主動跟在場記者握手，記者讚她打扮得很性感，她笑說：「真嘅？我覺得自己好似一個公主。（感受到粉絲嘅熱情？）感受到，我尋日第一次出去行街時遇到粉絲，見到佢哋好開心好熱情。（喺香港出活動酬勞賺好多？）係咩？我唔知，好開心可以獲邀參加咁大型嘅品牌活動。」
崔始源近距離放電
而崔始源於活動期間還主動走到粉絲面前跟他們握手和拿起粉絲的手機大玩自拍，冧得粉絲尖叫聲不絕，即場被他電暈。問到粉絲們是否很瘋狂？他感恩說：「大家咁多年嚟對我嘅支持都冇變，無論係粉絲定傳媒都對我好好，好多謝大家，香港粉絲一直都對我咁支持，唔理我有好定唔好嘅新聞，佢哋都冇變過。」他又謂非常欣賞影帝周潤發（發哥），大讚他型到爆！
想偉仔發哥再合作
此外，高貴大方的嘉玲現身時，亦識做派吻，她表示有留意發哥和丈夫梁朝偉的「億元世紀合照」：「真係好難得，佢哋都好耐冇見，我想佢哋一齊再拍戲，（加埋你？）如果係就我同發哥做情侶，（咁偉仔咪好hurt？）唔會啦，好玩啲嘛。（如果偉仔同發哥拍戲咪億元組合？）佢哋係天價啦，不過票房都會相當好。」她又大讚發哥現時非常有型，更大呻自己與發哥合作拍攝的電影《賭城風雲Ⅱ》未夠喉，還希望再度合作及寄望可看見對方與周星馳合作拍攝電影。而黃宗澤對舊愛胡杏兒有新歡，即大方送上祝福：「梗係恭喜佢啦，戥佢開心，拍拖係開心事。」
文：名人組