學友搞小型騷 棘手拒讓步
「歌神」張學友屹立樂壇卅載，所開的世界巡唱亦創下不少輝煌紀錄，盛傳能賺到億億聲落袋！學友近日正構思舉辦小型音樂會，但開會時發現「窄窄地」，不少細節問題要處理，他直言對音樂好堅持，要百分百由他話事！
學友由寶麗金年代到現時環球，足足有三十個年頭，最近連經理人工作也轉交環球處理，即使已合作多年，但仍要慢慢磨合，他說：「我啲脾氣、習慣要同佢哋講，（你有咩脾氣？）我啲脾氣咪咁囉，要照晒我做囉。」學友笑言平日的他好好相與，但如果開會或要拗的時候，他會好嚴肅、固執，工作人員是否好驚他？他笑說：「驚驚哋，（你係咪戰無不勝？）開騷嘅會梗係。」
畀人賺冇所謂
學友透露跟環球初步構思舉辦小型宣傳音樂會，但商議過程中「窄窄地」，他說：「嗰粒釘幾多錢都講埋我聽，佢哋以為我乜都理，但呢啲我一向唔理。」他坦言搞個人騷，所有事都堅持，尤其音樂方面他絕不放手，舞台、燈光都要理晒，服裝方面他可以稍作妥協。學友跟環球並沒有簽經理人合約，他說：「都係睇大家誠信問題，（你幫環球賺錢？）佢都有幫我，佢又唔係唔使做，佢哋都多咗工作負擔。」
學友每次做世界巡迴演唱會都過百場，有指是一舊「肥豬肉」，他笑說：「我知，反正我都要畀人做，（點解自己唔搞間公司控制晒？）我唔覺得需要咁樣，唔係所有錢都自己賺晒，我覺得大家賺番應得嘅OK，將來搞演唱會，跟番自己角色，主辦歸主辦分花紅，經理人歸經理人，應該係咁樣，（你以前做法呢？）我以前冇問吖嘛，亦唔知道。」
謝絕開幾十場
談到若再舉行世界巡演，會比以前更多場？學友認為主要睇巿場，談到他被喻為品質保證，他說：「表演唔係話做就做，即使有巿場，你有冇體力做呢？即使賣到好多場，你鬥唔鬥得過呢？又或者你想做，但未必有巿場。」
他坦言早年香港歌手慣例連演幾十場，他覺得好癲，他說：「依家唔會再咁做，冇咁傻，我都唔贊成咁做，以前見過阿倫（譚詠麟）同自己，完騷塊面灰色o架，嚇死人。」他強調不是超人，表演要有好狀態，為觀眾為自己身體長遠去睇，唔好太過勞，要畀身體休息。
攝：劉智源
場地：九龍海逸君綽酒店
文：音樂組