阿嬌呻笨跌千萬人仔
鍾欣潼（阿嬌）與大多港星一樣，近年專注在內地掘金拍戲，「人仔」密密搵，與好姊妹蔡卓妍（阿Sa）工作上少見面，阿嬌送上電動麻雀枱聯繫感情，而早已是圈中小富婆的阿嬌，在港一早有樓揸手，卻後悔放棄北京置業，錯失當上千萬業主機會。
鍾欣潼和好姊妹蔡卓妍近年事業分道揚鑣出擊，拍戲拍劇各有精彩，但兩姊妹感情依然親密緊扣，阿嬌表示：「大家見我哋工作上面少一齊，但係我哋私底下都有約嘅，就算見唔到都講到電話啦！」阿嬌自爆阿Sa生日時更送了一份「大型玩具」，她笑謂：「我送咗枱電動麻雀機畀佢。」
約阿Sa開枱
在四方城上聯繫姊妹情？阿嬌表示：「我哋邊使靠打牌呀，阿Sa有叫我上去『剪綵』，但都未有機會，我打牌疊牌好慢，雙手太細，有電動麻雀機，唔使再被人用嗰種『你疊完未？』嘅眼神望住！」講到牌品好人品自然好？阿嬌笑道：「係呀，我牌品好好o架。（準備贏番張麻雀枱返嚟？）又唔使咁，我哋唔係打好大，衞生麻雀嚟！」
臨老考車牌
早前阿嬌出席英皇旗下的豪宅樓盤宣傳，早年她已成功置業，樓價有升冇跌，令阿嬌身家暴漲成圈中小富婆。阿嬌辯稱仍在努力供樓：「唔知供到幾時，冇問過，我唔想有壓力，就係一直做一直供，有一日突然話我知供完咪好開心囉。」問可有投資內地樓市？阿嬌不禁說：「當年第一次置業有諗過北京買樓，但因為啱啱香港買咗，如果供兩邊壓力好大喎！但後來就好後悔啦，當時北京一棟豪宅四百幾萬，之後一兩年已經飆升到2千幾萬。（揼心？）算啦，唔係你就唔係你嘅。」
阿嬌之前一直想考車牌，但因脊椎傷患令她放棄學車：「有心機有時間都醫好個身體先，學車呢樣我決定留番老咗先考，就好似有啲人老咗去學插花，而我就去學車啫。」
髮型：Davy Yu＠salon amarone
化妝：Circle Cheung（ndnco.co）
服裝：Chris by Christoper Bu
場地：GATEWAY HONG KONG HOTEL
文：音樂組
攝：張福宏