李思欣 楊秀惠 芳心蜜語
藝人李思欣與楊秀惠自2004年第一次合作拍劇而認識，漸漸熟絡後成為了不可分割的好姊妹，秀惠眼見好姊妹成婚後過着幸福生活而感到安心，思欣則希望對方遇上對的人，齊齊做幸福人妻。
唔熟唔食
李：我記得第一次同你合作拍劇，係2004年嘅《赤沙印記@四葉草.2》，雖然喺劇裏面同你做一家人，但係嗰時唔知點解同你一啲都唔熟。
楊：直至2007年拍《奸人堅》，傾多咗偈之後，發現大家原來有好多共同話題而變得好熟。
李：起初我覺得你好靜，好有性格，唔會點同人講嘢，最多都係自己坐低無啦啦唱歌。
楊：係呀！嗰時啱啱入TVB，連廣東話都講唔好，所以好少同人傾偈，最多都係問人啲字點讀！
李：其實我都唔係好得你幾多，好多時都係自己一個人，又唔會收咗工之後一齊食飯。
感情用事
後來同你熟絡咗，就開始傾吓感情事。
係呀！嗰時未結婚，每次同阿范（老公范振鋒）有拗撬就會問你意見。
作為你嘅好朋友，每次見你唔開心都係想幫你分析吓件事，唔會鬧你，係想畀你知道事情一定有好有壞。
我結婚嗰陣，你仲做我姊妹添！
我咁大個女，都只係做過人哋嘅姊妹，其中一個就係你！我覺得朋友唔使多，知心嘅幾個就夠。
唔開心嘅時候，你都陪我喊過，多謝你教我處事、畀意見。
有時候畀意見你，都係想你諗得全面啲，大家對大家都冇私心。
鬧者愛也
李：你有冇鬧過我？好似係我鬧你多啲喎！不過唔係鬧嘅，係緊張你！
楊：我梗係知你係為我好啦！
李：有時候你會嚟我屋企，我又會陪吓你跑步。
楊：係呀！平時你都唔下廚嘅，見到你識煮羅宋湯、咖喱雞，真係好surprise！
李：我冇你咁叻，識得整蛋糕、曲奇餅。
涉足商場
李：其實我都係因為老公嘅關係，先會接觸做生意，你就唔同，護膚品店係你自己一手一腳搞出嚟！
楊：啱啱開舖嗰陣真係好辛苦，咩都要落手落腳去做，嗰一排都少咗見你啦！
李：唔緊要，知道你忙，雖然我同老公同朋友夾份開咗幾間食肆，但做生意真係唔叻。
楊：有時候舖頭有新貨，都會拎畀你試，多謝你做我嘅白老鼠。
李：咁啲護膚品我試完，我唔會呃你㗎嘛，畀最真實嘅意見你。
楊：咁我去你舖頭食嘢，好唔好食我都唔會呃你啦！
情歸何處
楊：見到你同阿范（范振鋒）結婚，真係好羨慕你咁幸福快樂！
李：我都想你快啲結婚㗎！大家齊齊做人妻！
楊：呢啲嘢隨緣啦！都咁多年啦，唔差在等多幾年！
李：嗰時我同阿范拍拖兩個月就打算結婚，你有冇想阻止我？
楊：阻止就冇，我唔會叫人分手，因為我覺得一對情侶嗌交一定有，但唔需要去到分手階段，當時聽到你想結婚，係好替你開心！
李：其實好多謝你喺我有感情問題嘅時候，不斷同我分析同畀意見。
楊：咁你快啲生BB啦！哈哈！
文：影視組